گاڤ

بالیۆزێ ئێكه‌تییا ئه‌ورۆپى ل ئیراقێ راگه‌هاند؛ ئێكه‌تییا ئه‌ورۆپى و نه‌ته‌وه‌یێن ئێكگرتى د هه‌ڤڕانه‌ كو هه‌لبژارتن بێى پشكدارییا حزبه‌كا مه‌زن یا وه‌كى پارتى د سه‌ركه‌فتى و دیمۆكراسی نابن.

سه‌رۆك بارزانى ئه‌ڤرۆ چارشه‌مبیێ پێشوازى ل تۆماس سیله‌ر بالیۆزێ ئێكه‌تییا ئه‌ورۆپى ل ئیراقێ كر.

باره‌گایێ بارزانى راگه‌هاند "د دیداره‌كێ دا، بیروبۆچوون ل دۆر ره‌وشا سیاسى ل ئیراقێ هه‌روه‌سا هه‌لبژارتنێن هه‌رێما كوردستانێ هاتنه‌ ئالوگۆركرن".

سه‌رۆك بارزانى ئاماژه‌ ب وێ چه‌ندێ كر "هه‌ر ژ پشتى سه‌رهلدانێ پارتى ده‌ستپێشخه‌را دیمۆكراسیێ و برێڤه‌چوونا هه‌لبژارتنان و گوهۆڕینا شه‌رعییه‌تا شۆڕشگێرى بۆ شه‌رعییه‌تا یاسایى و ده‌ستوورى بوویه‌ و هه‌رده‌م پشته‌ڤانا برێڤه‌چوونا هه‌لبژارتنان بوویه‌ ل هه‌رێما كوردستانێ".

ل گۆره‌ى به‌یانه‌كا باره‌گایێ بارزانى "ئه‌و تێبینیێن پارتى ل سه‌ر هه‌لبژارتنان هه‌ین ژ به‌ر بێبه‌هركرنا پێكهاته‌یان د هه‌لبژارتنان دا و زێده‌بوونا كێشه‌یێن ته‌كنیكى و ده‌ستكارییا نه‌ده‌ستوورى د یاسایا هه‌لبژارتنان دا و بزاڤێن دیزاینا پێشوه‌خت بۆ ئه‌نجامێن هه‌لبژارتنان بوون، پارتى ژى ژ بۆ پاراستنا بهایێن دیمۆكراسیێ و برێڤه‌چوونا هه‌لبژارتنێن پاقژ و زه‌لال ئه‌و هه‌لویسته‌ وه‌رگرتیه‌".

به‌یانێ دیار ژى كریه‌ "سه‌رۆك بارزانى دوپاتكر كو پارتى هه‌رده‌م ل گه‌ل هه‌لبژارتنان بوویه‌ و د نوكه‌ ژى دا داخواز دكه‌ت ب زویترین ده‌م ئه‌و تێبینى و بابه‌تێن ته‌كنیكى یێن رێگر د برێڤه‌چوونا هه‌لبژارتنه‌كا ساخله‌م دا بهێنه‌ چاره‌كرن، سه‌رۆك بارزانى سوپاسییا هه‌لویستێ جڤاكێ نێڤده‌وله‌تى و نه‌ته‌وه‌یێن ئێكگرتى كر كو هاتینه‌ سه‌ر خه‌ت و ب گرنگى ڤه‌ بۆچوون و تێبینیێن پارتى وه‌رگرتینه‌".

سه‌رۆك بارزانى ئاماژه‌ ب وێ چه‌ندی كر "هنده‌ك پێشڤه‌چوون هه‌نه‌ دا كو لایه‌ن پێكڤه‌ كار ل سه‌ر نه‌هێلانا كێشه‌یان بكه‌ن، پاشئێخستنا هه‌لبژارتنان بۆ چه‌ند هه‌یڤان گه‌له‌ك گرنگتره‌ ژ وێ چه‌ندێ هه‌لبژارتنه‌ك برێڤه‌بچیت كو تێدا مافێن ده‌نگده‌ران و پێكهاته‌یان بهێته‌ بنپێكرن".

ژ لایێ خۆڤه‌، بالیۆزێ ئێكه‌تییا ئه‌ورۆپا ل ئیراقێ دوپاتكر "ئێكه‌تییا ئه‌ورۆپى تێبینیێن پارتى ل سه‌ر لایه‌نێن ته‌كنیكى یێن هه‌لبژارتنان و بێبه‌هركرنا پێكهاته‌یان ب رژدى وه‌رگرتیه‌ و ژ نزیك ڤه‌ ل گه‌ل نه‌ته‌وه‌یێن ئێكگرتى دویڤچوونێ بۆ چاره‌كرنا وان كێشه‌یان دكه‌ت".

راگه‌هاند ژى "ئێكه‌تییا ئه‌ورۆپى و نه‌ته‌وه‌یێن ئێكگرتى ل سه‌ر وێ چه‌ندێ د هه‌ڤڕانه‌ كو هه‌لبژارتن بێى پشكدارییا حزبه‌كا مه‌زن یا وه‌كى پارتى د سه‌ركه‌فتى و دیمۆكراسى نابن".