راهێنه‌رێن ریال مه‌درید و به‌رشلۆنا ل دۆر یارییا كلاسیكۆ یا سوبه‌هى چ دبێژن؟
بەلاڤ بکە
گاڤ
راهێنه‌رێ به‌رشلۆنا دوپاتى ل سه‌ر سه‌ركه‌فتنێ ل سه‌ر ریال مه‌درید ژ بۆ ڤه‌گه‌ڕیانێ بۆ هه‌ڤڕكییێ د خۆلا ئسپانیا دا كر، ژ لایێ خۆڤه راهێنه‌رێ ریال مه‌درید دیاركر كو كلاسیكۆ ده‌لیڤه‌یه‌كه بۆ نزیكبوونێ ژ ئێكلاكرنا ناسناڤێ لالیگایێ.
د چارچووڤه‌یێ یاریێن گه‌ڕا 32 ژ خۆلا لالیگا یا ئسپانیا دا، ریال مه‌درید ل یاریگه‌ها خۆ سانتیاگۆ بێرنابێیۆ سوبه‌هى ئێكشه‌مبییێ دێ مێهڤاندارییا یانه‌یا به‌رشلۆنا كه‌ت، یانه‌یا ریال مه‌درید د نوكه دا ب كۆمكرنا 78 خالان ل سه‌رێ رێزبه‌ندییا خۆلا ئسپانیا ب جوداهییا 8 خالان ژ یانه‌یا به‌رشلۆنا دهێت.
كارلۆ ئه‌نچێلۆتى راهێنه‌رێ ریال مه‌درید د پرێس كۆنفرانسه‌كێ دا ئه‌ڤرۆ شه‌مبییێ گۆت "ئه‌م دێ یاریێ ل گه‌ل تیمه‌كێ كه‌ین كو هه‌ڤڕكییه‌كا مه‌زن دكه‌ت، ئه‌و د ره‌وشه‌كا باش دانه".
زێده‌تر ژى گۆت "وه‌ك هه‌رده‌م هه‌ڤڕكى د كلاسیكۆیێ دا هه‌یه، ئه‌و ده‌لیڤه‌یه‌كه ژ بۆ نزیكبوونێ ژ ئێكلاكرنا ناسناڤێ خۆلێ".
ژ لایێ خۆڤه، چاڤێ هێرناندێز راهێنه‌رێ به‌رشلۆنا دیاركر "ل سه‌ر مه پێدڤییه فشارێ ژ بۆ تۆماركرنا سه‌ركه‌فتنێ ل سه‌ر سه‌ركێشا خۆلێ بكه‌ین، مه ده‌لیڤه ژ بۆ ڤه‌گه‌ڕیانێ بۆ هه‌ڤڕكییێ ل سه‌ر ناسناڤێ خۆلێ هه‌یه".
د دویماهیك پێنج كلاسیكۆیێن دناڤبه‌را ریال مه‌درید و به‌رشلۆنا دا، ریال مه‌درید د سێ یارییان دا بسه‌ركه‌فتییه به‌رانبه‌ر دو سه‌ركه‌فتنان بۆ به‌رشلۆنا.
