گاڤ

لێكۆلینه‌كا ساخله‌مییێ یا نوى ئاشكرا كریه‌؛ نڤستنا كێمتر ژ شه‌ش ده‌مژمێران رۆژانه‌ مه‌ترسییا تووشبوونێ ب نه‌خۆشییا شه‌كرێ ژ جۆرێ دوێ زێده‌ دكه‌ت.

لێكۆله‌ران داتایێن 247867 كه‌سێن پێگه‌هشتى ل بریتانیا ئه‌نالیزكرینه‌ و بۆ پتر ژ 10 سالان دویڤچوونا وان كرینه‌.

پرسیار ژ پشكدارێن لێكۆلینێ ل دۆر ژماره‌یا ده‌مژمێرێن ئه‌و رۆژانه‌ دنڤن هاته‌ كرن و د ده‌مێ دویڤچوونێ دا نزیكى 3.2% ژ پشكداران تووشى نه‌خۆشییا شه‌كرێ ژ جۆرێ دوێ ببوون.

ل گۆره‌ى لێكۆلینه‌كا د كۆڤارا ساینس ئه‌لێرت دا به‌لاڤبووى "نڤستنا 5 ده‌مژمێران رۆژانه‌ بوویه‌ ئه‌گه‌رێ زێده‌بوونا مه‌ترسییا تووشبوونێ ب نه‌خۆشییا شه‌كرێ ژ جۆرێ دوێ ب رێژه‌یا 16%".

ئاشكرا ژى كریه‌ "هه‌روه‌سا ئه‌و كه‌سێن رۆژانه‌ 3 ده‌مژمێران بۆ 4 ده‌مژمێران دنڤن مه‌ترسییا تووشبوونا وان ب نه‌خۆشییا شه‌كرێ ب رێژه‌یا 41% زێده‌بوویه ب هه‌ڤبه‌ركرن ل گه‌ل وان كه‌سێن 7 بۆ 8 ده‌مژمێران رۆژانه‌ دنڤن‌".

هه‌ر ل گۆره‌ى لێكۆلینێ، نڤستنا 7 بۆ 8 ده‌مژمێران رۆژانه‌ ب نڤستنه‌كا سرۆشتى دهێته‌ هژمارتن و ئه‌ڤ چه‌نده‌ بۆ كێمكرنا مه‌ترسییا تووشبوونێ ب نه‌خۆشییا شه‌كرێ هاریكاره‌، زێده‌بارى رێكارێن دى وه‌كى خوارنا ساخله‌م و ستایلێ ژیانێ یێ ساخله‌م.