ژ بهر ههڤژینا خۆ.. سهرۆكوهزیرێ ئسپانیا هزر د دهستژكاركێشانێ دا دكهت
گاڤ
سهرۆكوهزیرێ ئسپانیا ژ بهر ههڤژینا خۆ هزر د دهستژكاركێشانێ دا دكهت و ل رۆژا دوشهمبییا بهێت دێ بڕیارا خۆ دهت و راگههینیت.
پێدرۆ سانشێز سهرۆكوهزیرێ ئسپانیا ئهڤرۆ چارشهمبییێ ل سهر تۆڕا ئێكس راگههاندیه؛ ئهو هزر د پێشكێشكرنا دهستژكاركێشانا خۆ دا دكهت پشتى دهستپێكرنا لێكۆلینهكێ ل گهل ههڤژینا وى ب تۆمهتا مفاوهرگرتنێ ژ پێگههێ خۆ و گهندهلییێ.
پێدرۆ سانشێز گۆت "ئهز پێدڤى مه راوهستم و هزرا خۆ د بڕیارهكێ دا بكهم، ئهو ژى كا دێ د پۆستێ سهرۆكوهزیری دا بهردهوام بم یان ژى ل سهر من پێدڤییه دهستبهرداریێ ژێ بكهم".
ئاشكرا ژى كر "ل رۆژا دوشهمبییا بهێت دێ بڕیارا خۆ بۆ میدیایان راگههینم"، ههڤدهم وى تا دوشهمبییێ چالاكیێن خۆ راگرتینه.
دادگهها دادپهروهریێ یا بلند ل مهدرید راگههاندیه "ئێك ژ دادگههان ل مهدرید رێكارێن دهستپێكى ل ههمبهر ههڤژینا پێدرۆ سانشێز سهرۆكوهزیرێ ئسپانیا ژ بهر گۆمانێن ههبوونا پهیوهندییان دناڤبهرا وێ و هندهك كۆمپانیێن تایبهت دا و پاشى وهرگرتنا وان كۆمپانییان بۆ گرێبهستان و پارهیێ گشتى ژ حكومهتێ دهستپێكرینه".
ههر ژ خزیرانا سالا 2018 تا نوكه پێدرۆ سانشێز سهرۆكوهزیرێ ئسپانیا یه، پشتى ڤهكێشانا باوهریێ ژ ماریانۆ راخۆى سهرۆكوهزیرێ بهرێ یێ ئسپانیا ژ بهر كێشهیهكا گرێداى گهندهلییێ.