گاڤ

شڤێدی درەنگ لژنەیا موەلیدەیان ل پارێزگەها دهۆکێ بریارا کێمکرنا دەمێ کارکرنا موەلیدەیان دا و ئەڤرۆ سپێدێ ئێکەم بریارا پارێزگەرێ دهۆکێ دای، هەلوەشاندنا وێ بریارێ بوو.

شڤێدی نێزیکی دەمژمێر 12:00 نیڤا شەڤێ، لژنەیا موەلیدەیان ل پارێزگەها دهۆکێ بریار دا دەمێ کارکرنا موەلیدەیان ل پارێزگەها دهۆکێ ژ 24 دەمژمێران بۆ 17 دەمژمێران بهێتە کێمکرن و ئەو 7 دەمژمێر ل سەر دەمێن رۆژێ بهێنە دابەشکرن.

ئەڤرۆ سپێدێ، د. عەلی تەتەر، پارێزگارێ دهۆکێ بەری دەمژمێر 9:00ی سپێدێ و د ئێکەم بریارا خۆ یا ئەڤرۆ دا، بریارا لژنەیا موەلیدەیان هەلوەشاند و راگەهاند: پێدڤییە ل دەمێ کارەبا نشتیمانی نەبیت، موەلیدە کار بکەن.

بریارا پارێزگارێ دهۆکێ د دەمەکی دایە کو هەر ئەڤرۆ وەزارەتا کارەبێ یا هەرێما کوردستانێ راگەهاندییە: چاکسازی د یەکەیێن بەرهەمئینانا کارەبێ دا ب سەرکەفتییانە بەر ب قووناغێن دویماهییێ دچن و سوبەهی رۆژا ئەینییێ دەمژمێرێن پێدانا کارەبا نشتیمانی دێ ئاسایی بنە ڤە.