گاڤ

شڤێدی ل باژێڕەکێ تورکیا خەلکی ب سەر تاخەکێ سوورییان دا گرت و ئەگەر بۆ وێ یەکێ ڤەدگەڕیت کو سوورییەک ب دەستدرێژیکرنێ ل سەر زارۆیەکێ تومەتبارە.

ل پارێزگەها قەیسەری ل تورکیا، پەنابەرەکێ سووری ب تومەتا دەستدرێژیکرنێ ل سەر زارۆیەکا 5 سالی هاتییە گرتن و ئەڤە بوویە جهێ تۆڕەبوونا خەلکێ وێ پارێزگەهێ.

ل گۆرەی ئاژانسا دیها یا تورکی، شڤێدی ل پارێزگەها قەیسەری ل تورکیا خەلک رابوویە سەرخۆ و ب سەر دوکان و مولکێن سووریان دا گرتییە. خەلکێ وێ پارێزگەهێ، چەندین دوکان و مال و ترومبێل و ماتۆرسکلێن پەنابەرێن سووری سۆتینە و ب درووشمان داخواز ژ حکومەتا تورکیا کرییە: پەنابەرێن سووری و خەلکێ بیانێ ژ ناڤ وان دەربێخن.

پۆلیسێن تورکیا بزاڤێن راوەستاندنا خەلکێ تۆڕە کرینە، لەورا 10 پۆلیس بریندار بووینە و پارێزگارێ قەیسەرییێ داخواز ژ خەلکی کرییە: خۆ ئارام بکەن، تاکو لێکۆلین ب دویماهی دهێن و سۆز دایە تاوانبار بگەهیتە سزایێ خۆ.

ل تورکیا نێزیکی ملیۆنەک و 200 هزار پەنابەرێن سووری هەنە و پارتییێن ئۆپۆزسیۆن بەردەوام داخوازا دیپۆرتکرنا وان دکەن و پارتییا ئاکەپە یا دەستهەلاتدار و رەجەب تەیب ئەردۆگان، سەرۆکێ تورکیا تا نوکە چ پلانێن ئاشکرا بۆ بابەتێ پەنابەرێن سووری نینن.