ژ به‌رى فاينالا مونديالێ.. پێنج ياريكه‌رێن فره‌نسا تووشى ڤايرۆسێ حێشترێ بوون
بەلاڤ بکە
گاڤ
راپۆرتێن رۆژنامه‌ڤانى ئه‌ڤرۆ ئه‌ينيێ ئاشكرا كرن كو پێنج ياريكه‌رێن هه‌لبژارتيێ فره‌نسا تووشى ڤايرۆسێ حێشترێ بووينه.
ڤايرۆسێ مێرس MERS كو ب ڤايرۆسێ حێشترێ دهێته بناڤكرن، كورتيا ناڤێ سێندرۆما هه‌ناسه‌دانێ يا رۆژهه‌لاتا ناڤينه و ئێكه ژ جۆرێن خێزانا ڤايرۆسێ كۆرۆنايێ.
رۆژنامه‌يا تێليگراف يا بريتانى به‌لاڤكريه؛ ژ به‌رى 48 ده‌مژمێران ژ ياريا دويماهيێ يا مونديالێ، هه‌ر ئێك ژ رافايێل ڤاران و ئيراهيما كوناتى تووشى ڤايرۆسێ مێرس بوون، ئه‌ڤ چه‌نده پشتى ژ به‌رى نوكه هه‌ر ئێك ژ ياريكه‌ران ئه‌دريان رابيۆت، دايوت ئوباميانكۆ و كێنلسى كۆمان تووشى ڤى ڤايرۆسێ بووين.
ديار ژى كريه؛ حاله‌ته‌كێ به‌ره‌لاييێ د كه‌مپا راهێنانێن هه‌لبژارتيێ فره‌نسا دا دروستبوويه و رێكارێن ژێكدویريا جڤاكى بۆ راوه‌ستاندنا به‌لاڤبوونا ڤايرۆسى هاتينه هاڤێتن.
تا نوكه راپۆرتان ب دروستى هه‌لويستێ هه‌ر پێنج ياريكه‌ران ژ پشكداريێ د فاينالا مونديالێ دا ئاشكرا نه‌كرينه.
ڤايرۆسێ مێرس ل سالا 2012 بۆ جارا ئێكێ ل سعووديه هاتبوو ئاشكرا كرن و ژ حێشتران بۆ مرۆڤان دهێته ڤه‌گوهاستن و نيشانێن وێ تا رادده‌يه‌كێ وه‌كى نيشانێن ئينفلوێنزايێ نه.
ل رۆژا ئێكشه‌مبيا بهێت، ياريا دويماهيا مونديالا قه‌ته‌ر 2022 دێ دناڤبه‌را هه‌لبژارتيێن فره‌نسا و ئه‌رجه‌نتين دا هێته كرن و هه‌ر هه‌لبژارتيه‌ك ژ وان دێ بزاڤێ كه‌ت بۆ جارا سيێ د ديرۆكا خۆ دا ناسناڤى بده‌ستڤه‌بينيت.
