گاڤ

به‌لجيكا داخواز ژ وه‌لاتيێن خۆ ل ئيرانێ كر كو وى وه‌لاتى ب جهـ بهێلن و سه‌ره‌دانا وى وه‌لاتى نه‌كه‌ن.
د به‌يانه‌كا وه‌زاره‌تا ده‌رڤه‌ يا به‌لجيكا ئه‌ڤرۆ ئێكشه‌مبيێ دا هاتيه‌؛ ژ به‌ر مه‌ترسيێن ده‌سته‌سه‌ركرنا وان ژ لايێ هێزێن ئه‌منى يێن ئيرانى ڤه‌، داخوازێ ژ وه‌لاتيێن خۆ ل ئيرانێ دكه‌ين كو وى وه‌لاتى ب جهـ بهێلن.
به‌لجيكا هه‌روه‌سا داخواز ژ وه‌لاتيێن خۆ كر كو بۆ مه‌ره‌مێن گه‌شتيارى سه‌ره‌دانا ئيرانێ نه‌كه‌ن.
داخوازا وه‌لاتى به‌لجيكا پشتى ده‌سته‌سه‌ركرنا وه‌لاتيێ وێ ئوليڤيێ ڤاديكاستێل ل ئيرانێ هات.
هه‌ر ژ ده‌مێ ده‌ستپێكرنا خۆنيشاندانان ل ئيرانێ پشتى گيانژده‌ستدانا ژينا ئه‌مينى ل 16ى ئيلۆنێ پشتى ده‌سته‌سه‌ركرنا وێ ژ لايێ هێزێن ئه‌منى ڤه‌، ده‌ستهه‌لاتێن ئيرانى ب هزاران كه‌س ده‌سته‌سه‌ركرينه‌ و ب سه‌دان كه‌س د خۆنيشاندانان دا تا نوكه‌ بووينه‌ قۆربانى.