گاڤ

رێڤه‌به‌ریێن پۆلیسان ل دهۆك و زاخۆ و هه‌روه‌سا به‌ره‌ڤانیا باژێڕى ژى ئامارێن سالا بۆرى راگه‌هاندن، پۆلیسێن پارێزگه‌ها دهۆكێ ژى دیاركر، تا نوكه‌ فه‌رمانا گرتنێ بۆ زێده‌تر ژ 2 هزار كه‌سان ده‌رچوویه‌ و پۆلیسان نه‌شیاینه‌ ده‌سته‌سه‌ر بكه‌ن.

هێمن سلێمان، په‌یڤدارێ پۆلیسێن پارێزگه‌ها دهۆكێ د كۆنگره‌یه‌كێ رۆژنامه‌ڤانى دا راگه‌هاند، ل سالا 2022ێ 6527 تاوان هاتینه‌ كرن و 3667 تاوانبار هاتینه‌ ده‌سته‌سه‌ركرن و ئاشكراكر، فه‌رمانا گرتنێ بۆ 2445 تاوانباران ده‌رچوویه‌ لێ پۆلیسان نه‌شیاینه‌ ژبه‌ر ئه‌گه‌رێن جودا وان ده‌سته‌سه‌ربكه‌ن.

ژ ئالیێ خۆڤه‌ پۆلیسێن زاخۆ ژى كۆنگره‌یه‌كێ رۆژنامه‌ڤانى سازكر و راگه‌هاند، 3651 كه‌یس ل بنگه‌هێ وان هاتینه‌ تۆماركرن، هه‌روه‌سا دیاركر 3135 ژ وان كه‌یسان هاتینه‌ ئێكلاكرن و 516 ژ وان كه‌یسان ماینه‌.

هه‌ر ئه‌ڤرۆ بێوار عه‌بدولعه‌زیز، په‌یڤدارێ به‌ره‌ڤانیا باژێڕى ل پارێزگه‌ها دهۆكێ د كۆنگره‌یه‌كێ رۆژنامه‌ڤانى دا گۆت: 1775 روودان ل دهۆكێ دروست بووینه‌ و 31 كه‌سان د وان روودانان دا ژیانا خۆ ژ ده‌ست دایه‌.

عه‌بدولعه‌زیزى به‌حس ل زیانان ژى كر و گۆت: وان روودانان 4 ملیار و 581 ملیۆن دینار وه‌ك زیان ل پاش خۆ هێلاینه‌.