گاڤ

سەرۆکێ هەرێما کوردستانێ ئەڤرۆ ب بوونا جەژنا نەورۆز و سەرسالا وکردی پەیامەک بەلاڤ کر و تێدا ئێکرێزیێ کر

دەقێ پەیاما سەرۆک نێچیرڤان بارزانی:

"ب گەرمی ژ ناڤا دلێ خۆ جەژنا نەورۆزێ و سەرسالا کوردی ل وە هەموویان، ل خێزانێن سەربلندێن شەهیدان پیرۆز دکەم و من ڤیان ئێک ب ئێک بۆ هەموو دایک و باک، هەڤژین، زارۆ، خویشک، برا و کەسوکارێن شەهیدان هەنە".

"پیرۆزباهی، رێز و سلاڤێن من بۆ پێشمەرگەیێن قەهرەمان، بۆ ئاسایش و پۆلیس و دژەتیرۆر و هەموو هێزێن ئەمنی کو ئاسایش و ئارامیا کوردستانێ د پارێزن".

"پیرۆزباهی و رێز و سلاڤێن من بۆ هەموو وان کەسان یێن د هەر بوارەکێ کار و فەرمانبەراتیێ دا خزمەتێ دکەن، د ئاڤاکرن،بەرەڤپێشبرن و گەشەپێدانا کوردستانێ دا پشکدار و هەڤپشکن".

"نەورۆز جەژنا پیرۆزا نەتەوەییا کوردانە، جەژنا سەرکەفت و باوەریبخۆبوون، شانازی و شکومەندیێ یە. هێمایێ رابوون و ساخبوونا گیانێ کوردایەتی و حەزا ژیان و مرۆڤدۆستیا کورد و هەموو گەلێ کوردستانێ یە. نەورۆز د گیان، خوین، ناخ، و دەروونێ هەموو کوردەکێ دا وەک بزاڤێن رزگاری، ئازادی، ژیانەکا سەرفەراز، گەشتبوونا هیڤی و ئۆمێدان بۆ پاشەرۆژەکا باشتر نوی دبیت".

"ئاگرێ نەورۆزێ دیسان وەک هەردەم باوەری و هێز و تێهنا مە دەردئێخیت، ژبەر ڤێ یەکێ کورد نەکەفتینە و چ جاران ناکەڤیت، ژبەرکو هەموو دەستپێکێن بهارێ ل گەل ئێکەم خەتیرا نەورۆزێ دا گیانێ بەرخودان و ئازادی و سەرفەرازیێ د هەموو کوردەکێ دا ساخ دبیت".

"ئازادی و دەستکەفت بەرهەمێ گیانێ نەورۆزگێڕێن کورد و گەلێ کوردستانێ نە. ب گیان، خوین، روندک و دەهان سالێن خەبات و بەرهناگریا خەباتکەرێن کورد و کوردستانیان ب دەستڤە هاتینە".

"مە هەمووان بندەستی و ستەمکاریا دوهی یا ل بیرێ، مە هەمووان گرتن، ڤەگوهاستن، سوتن، وێرانکرن، ژناڤبرن، کیمیابارانکرن، ئەنفال و جینۆساید یێن ل بیرێ و چ جاران ژ بیرا مە ناچن. لێ ڤان هەموو تشتان نەشیا ئیرادەیا کورد و گەلێ کوردستانێ بۆ ژیان و ئازادی و سەرفەرازیێ بشکێنن! چونکی کورد ل گەل هەموو ئێکەم چریسکا نەورۆزێ دا دوبارە سەرهلددەت و ب هێزتر دەستپێدکەت".

"د نەورۆزێ دا ئیشق و ڤیانا کورد و گەلێ کوردستانێ بۆ ئازادی، بۆ ئاخ، بۆ وەلات و نەتەوەیی ژ دایک دبیت. هەر ئەوە نهێنیا مان و رابوونا ڤی گەلێ زیندی، کو ب هێزترین ستەمکار و چەکێ سەردەم نەشیانێ و چ جاران نەشێنێ".

"گەلێ کورد و کوردستانیێن خوشتڤی..

"بلا نەورۆز و بهارا نویبوونێ ل گەل خۆ، ل گەل خێزان، مال، کەسوکار و هەڤالێن خۆ دا بکەینە نویکرنا رێز، ڤیان، لێبوورین و ئاشتبوونێ".

"ل سەر ئاستێ سیاسی ژی بلا نەورۆزێ بکەینە دەلیڤەیەکا نوی بۆ هاریکاری، هەڤپشکی، هەڤدوقەبوولکرن و کارێ پێکڤە. داکو بشێین ل هەرێما کوردستانێ کێشە و ناکوکیان دەرباز کەین، ل گەل بەغدا ژی پێکڤە ب ئێک دەنگ و ئێک هەلویست ب دانوستاندن ل سەر بنەمایێ دەستووری کێشەیان چارە بکەین".

"هەر د ڤێ بوونێ دا، داخوازێ ژ ئالیێن ئیراقی دکەم ب گیانەکێ ئیراقیانەیا نشتیمانی کو حزب، نەتەوە، ئاین و مەزهەبان دەرباز بکەن و ئەم هەموو پێکڤە بۆ ئیراقەکێ کار بکەین کو وەلاتێ مە هەموویان بیت، ئیراقەک کو ئارامی، سەقامگیری، سەروەری، ژیان، شکو، نوکە و پاشەرۆژا نفشێن وێ د پاراستی بن، ئیراقەک کو ئەم هەموو پێکڤە بشێین بکەینە نشتیمانەکێ باشتر بۆ هەمووان".

"ل گەل حکومەتا فیدرالا ئیراقێ ب ئارستەیەکێ راستدا دچین، گاڤ جهێ ئۆمێد و خۆشحالیێ نە. چارەکرنا کێشەیان، دروستکرنا باوەریێ، باوەری د ناڤبەرا ئالی و پێکهاتەیان دا، ئیراقێ دێ کەنە وەلاتەکێ بهێز و پاراستی و رێزلێگرتی. هەرێما کوردستانێ ژی د بن روناهیا دەستووری دا بەرهەڤی هەموو هاریکاریەکێ یە بۆ سەرخستنا کارنامەیا حکومەت و پرۆسەیا سیاسی و بنەمایێن دیمۆکراسیێ ل ئیراقێ".

کوردستانیێن خۆشتڤی..

"گەشت، سەیران، جۆش و خرۆشا نەورۆزێ نیشاندانا ساخی، ژیاندۆستی و ئاشتیخوازیا کورد و کوردستانیا نە. ئەو کەرناڤالا رەنگین د ناڤا سروشتێ جوانێ کوردستانێ دا د گێڕین، د حەزەکا کویر دا بۆ ژیان و ئارامی، بۆ کامەرانی و ئاسوودەیێ، بۆ پێکهاتن و ئاشتەوایێ کار دکەت، پشکەکا گرنگ و ب بها و گیان و کلتووری یا نەتەوەیێ مەیە".

"ئەم ل هەرێما کوردستانێ دەستێ برایەتی، پێکڤەژیان، هەڤدوقەبوولکرن و لێبوورینێ بۆ هەموو گەل و نەتەوە و پێکهاتەیێن ئیراق و وەلاتێن جیران و دەڤەرێ و جیهانێ درێژ دکەین. هەموویان پشتراست دکەین کو وەک هەردەم فاکتەرێن ئارامی و سەقامگیری، پاراستن، رێزلهەڤدوگرتن و بەرژەوەندیێن هەڤپشک بین".

"پیرۆزباهیێ ل وان گەل و نەتەوەیان دکەم یین جەژنا نەورۆزێ د گێڕن. سلاڤ و پێزانین بۆ پشتەڤانیا وەلاتێن دۆست، جڤاکا نێڤدەولەتی، دپلۆماتکاران و رێکخراوێن وان ل هەرێما کوردستانێ. هیڤیدارم نەورۆزەکا خۆش دەرباز بکەن".

"داخوازیی ژ وەلاتیێن عەزیز دکەم د گەشت و سەیرانان دا ئاگەهداری خۆ بن، پاقژیا ژینگەهـ و سروشتی جوانێ کوردستانێ ب پارێزن و پابەندی رێنمایێن هاتنوچوونێ بن".