مێسى هه‌لویستێ خۆ ل دۆر بڕیارا پاریس سان جێرمان راگه‌هاند و بريكارێ كارێن وى نهێنیه‌ك ئاشكرا كر
بەلاڤ بکە
گاڤ
لیۆنێل مێسى ئێكه‌م كارڤه‌دانا خۆ پشتى ناكۆكیا ڤێ دویماهیێ یا وى ل گه‌ل یانه‌یا پاریس سان جێرمان راگه‌هاند هه‌ڤده‌م بریكارێ كارێن وى دیاركر كو ئه‌و نامینیته دناڤ رێزێن یانه‌یا فره‌نسى دا.
سه‌ره‌دانا مێسى د ده‌مه‌كێ دى دا ژ ڤێ حه‌فتیێ بۆ سعوودیه بێى ئاگه‌هداركرنا كارگێریا یانه‌یا پاریس سان جێرمان ببوو جهێ دلگرانیا یانه‌یێ و بڕیارا دویرخستنا وى ژ یاریان بۆ ده‌مێ دو حه‌فتیان دابوو.
مێسى ئه‌ڤرۆ ئه‌ینیێ د ستۆریه‌كێ ئینستاگرامى دا داخوازا لێبۆرینێ ژ یانه‌یێ خواست و گۆت "من هزر دكر كو پشتى یاریا ل گه‌ل لۆریان، وه‌كى هه‌ر جار دێ مه بێهنڤه‌دان بۆ ده‌مێ رۆژه‌كێ هه‌بیت، له‌وا من پلانا وێ گه‌شتێ دانابوو و نه‌دشیام كه‌نسل بكه‌م".
هه‌ڤده‌م ژماره‌یه‌كا راپۆرتێن رۆژنامه‌ڤانى ژ خۆرخێ مێسى بابێ لێۆنێل مێسى و بریكارێ كارێن وى ڤه‌گوهاستینه كو مێسى گرێبه‌ستا خۆ ل گه‌ل یانه‌یا پاریس سان جێرمان نوى ناكه‌ت كو ل 30ى خزیرانا بهێت ب دویماهیك دهێت.
هنده‌ك ژێده‌ران دیاركربوون كو یانه‌یا هیلال یا سعوودى دێ ئۆفه‌ره‌كا زه‌به‌لاح ب مووچه‌یێ 400 ملیۆن یۆرۆیان سالانه پێشكێشى مێسى كه‌ت كو ب دو جاركى ژ مووچه‌یێ كریستیانۆ رۆنالدۆى ل گه‌ل یانه‌یا نه‌سر یا سعوودى پتره.
هه‌روه‌سا ژماره‌یه‌كا یانه‌یێن دى وه‌كى ئینته‌‌ر مایامى یا ئه‌مریكى، به‌رشلۆنا و هنده‌ك یانه‌یێن سعوودى یێن دى هزر د ڤه‌گوهاستنا مێسى بۆ دناڤ رێزێن خۆ دا دكه‌ن.
