گاڤ

شیره‌تكارێن ساخله‌میێ ل ئه‌مریكا رازیبوون ل سه‌ر ده‌رمانه‌كێ نوى بۆ چاره‌سه‌ریا نه‌خۆشیا زهایمه‌رێ (تێكچوونا بیردانكێ) دان و دهێته‌ چاڤه‌رێكرن ل هه‌یڤا بهێت كارگێریا خوارن و ده‌رمانان یا ئه‌مریكى بڕیارا دویماهیێ ل سه‌ر بده‌ت.

ئه‌ڤ رازیبوونه‌ گاڤه‌كا نوى یه‌ ژ بۆ چاره‌كرنا ژماره‌یه‌كا مه‌زن ژ كه‌سێن دانعه‌مر یێن ژ تێكچوونا بیردانكێ (زهایمه‌ر)ێ دنالن.

ده‌رمانێ ب ناڤێ لێكێمبى بوویه‌ جهێ رازیبوونه‌كا مه‌رجدار ژ لایێ كارگێریا خوارن و ده‌رمانان یا ئه‌مریكى ڤه‌ ل سه‌ر بنیاتێ ئه‌نجامێن ده‌ستپێكى كو تێدا دیار كرینه كو‌ ئه‌و ده‌رمانه‌ دبیته‌ ئه‌گه‌رێ سستكرنا پێشڤه‌چوونا نه‌خۆشیێ د ده‌مێ چه‌ند هه‌یڤان دا.

كارگێریا ده‌رمانان د نوكه‌ دا لێكۆلینێ ل سه‌ر وێ چه‌ندێ دكه‌ت كو ئه‌ڤ ده‌رمانه‌ رازیبوونا ته‌مام وه‌ربگریت.

لژنه‌یه‌كا شیره‌تكاران ئاماژه‌ ب وێ چه‌ندێ كرینه‌ كو ڤى ده‌رمانى ژماره‌یه‌كا مفایان بۆ تووشبوویێن زهایمه‌را سڤك یان یا به‌روه‌خت هه‌نه‌.

دهێته‌ چاڤه‌رێكرن كارگێریا خوارن و ده‌رمانان یا ئه‌مریكى ل 6ى تیرمه‌ها بهێت بڕیارا دویماهیێ ل دۆر وى ده‌رمانى بده‌ت.