گاڤ

راپۆرته‌كا میدیایى یا ئسپانى ئاماژه‌ دایه‌ وێ چه‌ندێ كو یانه‌یا پاریس سان جێرمان پێگوهۆڕێ كیلیان ئێمباپێ هێرشبه‌رێ یانه‌یێ د حاله‌تێ ده‌ركه‌فتنا وى ژ یانه‌یێ دا ده‌ستنیشانكریه‌.

گرێبه‌ستا ئێمباپێ ل گه‌ل پاریس سان جێرمان تا هاڤینا سالا 2024 به‌رده‌وامه‌ و ئه‌و یاریكه‌ره‌ ل سه‌ر درێژكرنا ماوه‌یێ گرێبه‌ستێ بۆ پشتى هاڤینا سالا 2024 رازی نه‌بوویه‌، له‌وا چاڤه‌رێ دهێته‌ كرن ل ڤێ هاڤینێ یان مێركاتۆیا هاڤینا سالا بهێت 2024 رێزێن یانه‌یێ ب جهـ بهێلیت، ل گۆره‌ى راپۆرتان، ریال مه‌درید نزیكترین یانه‌یه‌ بۆ ئه‌نجامدانا هه‌ڤبه‌ستێ ل گه‌ل ئێمباپێ.

ل گۆره‌ى رۆژنامه‌یا موندۆ دێپۆرتیڤۆ "پاریس سان جێرمان دویڤچوونا گۆنزالۆ رامۆس هێرشبه‌رێ هه‌لبژارتیێ پۆرتۆگالێ و یانه‌یا بێنفیكا یێ 22 سالى دكه‌ت دا كو ببیته‌ پێگوهۆڕێ ئێمباپێ ئه‌گه‌ر یانه‌ ب جهـ هێلا".

ئاشكرا ژى كریه‌؛ مه‌رجێ سزایى د هه‌ڤبه‌ستا گونزالۆ رامۆس ل گه‌ل بێنفیكا دا 120 ملیۆن یۆرۆنه‌، لێ بێنفیكا دێ یا به‌رهه‌ڤ بیت به‌رانبه‌ر 80 ملیۆن یۆرۆیان وى بفڕۆشیت.

گونزالۆ رامۆسى د وه‌رزێ بۆرى دا ئاسته‌كێ بلند ل گه‌ل بێنفیكا پێشكێشكربوو و 27 گۆل بۆ یانه‌یا خۆ تۆماركربوون.

هه‌روه‌سا وى یاریكه‌رى د موندیالا قه‌ته‌ر 2022 دا ئاسته‌كێ باش ل گه‌ل هه‌لبژارتیێ پۆرتۆگالێ پێشكێشكربوو.