سه‌رۆك نێچیرڤان بارزانى و هێزێن هه‌ڤپه‌یمانان ته‌كه‌زیێ ل سه‌ر چاكسازیێ دناڤ هێزێن پێشمه‌رگه‌ى دا دكه‌ن
بەلاڤ بکە
گاڤ
سه‌رۆكێ هه‌رێما كوردستانێ و فه‌رمانده‌یێ گشتى یێ هێزێن هه‌ڤپه‌یمانان ل ئیراقێ و سووریا ته‌كه‌زی ل سه‌ر چاكسازیێ دناڤ هێزێن پێشمه‌رگه‌ى دا كرن.
نێچیرڤان بارزانى سه‌رۆكێ هه‌رێمێ و فه‌رمانده‌یێ گشتى یێ هێزێن پێشمه‌رگه‌ى ئه‌ڤرۆ چارشه‌مبیێ پێشوازى ل جه‌نه‌رال ماتیۆ ماركفارلن فه‌رمانده‌یێ هێزێن هه‌ڤپه‌یمانان ل ئیراقێ و سووریا و شانده‌كێ ل گه‌ل دا كر.
ل گۆره‌ى به‌یانه‌كا سه‌رۆكاتیا هه‌رێما كوردستانێ، هه‌ردو لایان د كۆمبوونه‌كێ دا پرۆسێسا چاكسازیێ د وه‌زاره‌تا پێشمه‌رگه‌ى دا، ئێكخستن و رێكخستنا پێشمه‌رگه‌ى و كێشه و ئاسته‌نگێن ل هه‌مبه‌ر ڤێ پرۆسێسێ و چه‌وانیا چاره‌كرنا وان به‌حسكرن.
د به‌یانێ دا هاتیه ژى؛ هه‌ردو لایه‌ن د هه‌ڤرا بوون كو پرۆسێسا ئێكخستن و ئێكگرتنا پێشمه‌رگه‌ى و چاكسازیێن د وه‌زاره‌تا پێشمه‌رگه‌ى دا ل گۆره‌ى وى به‌رنامه‌یێ بۆ هاتیه دانان وه‌ك پێدڤى برێڤه‌نه‌چوویه و چه‌ندین تێبینى ل دۆر ڤێ چه‌ندێ هاتنه به‌حسكرن.
سه‌رۆك نێچیرڤان بارزانى ته‌كه‌ز كر كو سه‌ره‌راى هه‌مى كێشه و به‌ربه‌ستان، هه‌مى بزاڤ بۆ سه‌رخستنا پرۆسێسا چاكسازى و ئێكخستنا هێزێن پێشمه‌رگه‌ى دێ د به‌رده‌وام بن، هه‌روه‌سا سوپاسیا رۆل و پشته‌ڤانیا ئه‌مریكا بۆ سه‌رخستنا پرۆسێسێ كر.
د كۆمبوونێ دا كو كۆنسۆلێ گشتى یێ ئه‌مریكا ل هه‌رێما كوردستانێ ژى تێدا به‌رهه‌ڤ ببوو، په‌یوه‌ندیێن هه‌ولێر- به‌غدا، ره‌وشا ده‌ڤه‌رێ ب گشتى و چه‌ند پرسێن جهێ گرنگیپێدانا هه‌ڤپشك هاتنه به‌حسكرن.
سه‌رۆك نێچیرڤان بارزانى هه‌ر ئه‌ڤرۆ ل گه‌ل سیباستیان لوكونیۆ وه‌زیرێ به‌رگریێ یێ فره‌نسا ژى كۆمببوو و هه‌ردو لایان ته‌كه‌زى ل سه‌ر په‌یوه‌ندیێن دوستانه دناڤبه‌را كوردستان و فره‌نسا دا كربوون و سه‌رۆكێ هه‌رێمێ دیاركربوو كو كۆمبوون یا باش بوو.
