پێشوازیا وه‌لاتێن جیهانێ ل دیاركرنا ده‌مێ هه‌لبژارتنان ژ ئالیێ سه‌رۆك نێچیرڤان بارزانى ڤه
بەلاڤ بکە
گاڤ
وه‌لاتێن جیهانێ ب گه‌رمى پێشوازیێ ل دیاركرنا رۆژا هه‌لبژارتنێن په‌ڕله‌مانێ كوردستانی ژ ئالیێ نیچیرڤان بارزانى ڤه دكه‌ن و ب پرۆسه‌یه‌كا دیمۆكراسى و پارستنا مافێ ده‌نگێن وه‌لاتیان ناڤكرینه و داخواز ژى ژ ئالیێن سیاسى كرینه وێ پرۆسه‌یێ سه‌ربێخن.
مه‌رووسما سه‌رۆكاتیێ هاته ئیمزاكرن
دوهى ب مه‌رسوومه‌كا سه‌رۆكاتیا هه‌رێما كوردستانێ كو ژ ئالیێ په‌یڤدارێ حكومه‌تا هه‌رێما كوردستانی ڤه هاته خواندن و تێدا 25-2-2024یێ وه‌ك دیاركرنا رۆژا هه‌لبژارتنان ژ ئالیێ سه‌رۆكێ هه‌رێما كوردستانێ نێچیرڤان بارزانى ڤه هاتیه دیاركرن.
وه‌زاره‌تا ده‌رڤه یا ئهمریكا: هه‌لبژارتنێن ئازاد ره‌واتیێ دده‌ته حكومه‌تان
وه‌زاره‌تا ده‌رڤه یا ئهمریكا پێشوازى ل دیاركرنا ده‌ما هه‌لبژارتنان ژ ئالیێ سه‌رۆكێ هه‌رێما كوردستانێ ڤه كر و راگه‌هاند، هه‌لبژارتن ره‌واتیێ دده‌ته حكومه‌تان.
ئه‌ڤرۆ ئه‌ینیێ 4-8-2024ێ وه‌زاره‌تا ده‌رڤه یا ئهمریكا پێشوازى ل بڕیارا نێچیرڤان بارزانى، سه‌رۆكێ هه‌رێما كوردستانێ یا دیاركرنا ده‌ما هه‌لبژارتنێن په‌ڕله‌مانێ كوردستانێ ل 25-2-2024ێ كر و راگه‌هاند، هه‌لبژارتن ره‌واتیێ دده‌ته حكومه‌تان و و رێكێ ب وه‌لاتیان دده‌ت وان كه‌سان هه‌لبژێرن یێن نووراتیا وان د حمومه‌تان دا دكه‌ن.
فره‌نسا: د خوزایت هزێن سیاسى هه‌ڤكاربن بۆ پرۆسه‌یا هه‌لبژارتنان
كونسلێ نوى یێ فره‌نسا ل هه‌رێما كوردستانێ ژبه‌ر دیاركرنا رۆژا هه‌لبژارتنان ژ ئالێ سه‌رۆكێ هه‌رێما كوردستانێ ڤه داخواز ژ هه‌مى ئالیان كر بۆ رێكخستنا پرۆه‌سیا هه‌لبژارتن كار بكه‌ن.
رۆدۆلف ریچارد، كونسلێ نوى یێ فره‌نسا ل هه‌رێما كوردستانێ راگه‌هاند، ده‌ستنیشانكرنا رۆژا هه‌لبژارتنێن په‌ڕله‌مانێ كوردستانێ ژ ئالیێ سه‌رۆكی هه‌رێما كوردستانێ ڤه قۆناغه‌كا ئێكلاكه‌ره و گرنگه هه‌مى سازیێن په‌یوه‌ه‌ندیدار و هێزێن سیاسى هه‌ڤكار بن بۆ رێكخستنا پرۆسه‌یا هه‌لبژارتنان كو رێزێ ل رێسایێن نێڤده‌وله‌تى بگریت.
ئه‌لمانیا پێشوازى ل دیاركرنا ده‌مێ هه‌لبژارتنێن په‌ڕله‌مانێ كوردستانی كر
ئه‌ڤرۆ كونسلخانه‌یا ئه‌لمانیا پێشوازى ل دیاركرنا رۆژا هه‌لبژارتنان ژ ئالیێ نێچیرڤان بارزانى ڤه كر و راگه‌هاند، هه‌لبژارتن د ده‌مێ خۆ دا و دادپه‌روه‌رانه ب هێنه كرن.
ئه‌ڤرۆ ئه‌ینیێ كونسلخانه‌یا ئه‌لمانیا ل هه‌ولێرێ پێشوازى ل دیاركرنا ده‌مێ هه‌لبژارتنان ژ ئالیێ نێچیرڤان بارزانى، سه‌رۆكێ هه‌رێما كوردستانێ ڤه كر و راگه‌هاند، هانا هه‌مى ئالیه‌كى دده‌ین ب شێوه‌یكێ بنایتنه‌رانه پشكداریێ د هه‌لبژارتنان دا بكه‌ن و پشتراستیێ بده‌ن هه‌لبژارتن دده‌مێ خۆ دا بهێنه كرن و ب شێوه‌یه‌كێ ئازاد و دادپه‌روه‌ر و گشتیر بن.
بالیۆزخانه‌یا ئیتالیا پێشوازى ل دیاركرنا ده‌مێ هه‌لبژارتنێن هه‌رێمێ كر
بالیۆزخانه‌یا ئیتالیا ل به‌غدایا پایته‌ختێ ئیراقێ پێشوازى ل راگه‌هاندنا ده‌ما هه‌لبژارتنان ژ ئالیێ، نێچیرڤان بارزانى، سه‌رۆكێ هه‌رێما كوردستانێ ڤه ل 25-2-2024ێ كر و داخواز كر هه‌لبژارنه‌كا ئازاد، دادپه‌روه‌ر و بله‌ز بیت و مافێ ده‌نگدانێ ب بڕبڕا دیمۆكراسیێ ناڤكر و گۆت: دڤێت گه‌لێ كورد ب ده‌نگێ خۆ مافێ خۆ ب خوازیت.
هۆله‌ندا: پشته‌ڤانیا هه‌لبژارنه‌كا ئازاد دكه‌ین كو خه‌لك ده‌ربڕینێ ژ مافێ خۆ بكه‌ت
ئه‌ڤرۆ ئه‌ینیێ 4-8-2023یێ كونسلخانه‌یا گشتى یا هۆله‌ندا ل هه‌ولێری د تویته‌كێ دا راگه‌هاند، راگه‌هاندنه‌كا گرنگ ژ ئالیێ سه‌رۆكێ هه‌رێما كوردستانێ بۆ كرنا هه‌لبژارتنێن هه‌رێما كوردستانێ ل 25ى شواتا سالا بهێت.
هه‌روه‌سا كونسلخانه‌یا هۆله‌ندا دیاركریه، "ئه‌م ب ته‌مامى پشته‌ڤانیا هه‌لبژارتنه‌كا ئازاد، دادپه‌روه‌ر و گشتگیر دكه‌ین بۆ وێ یه‌كێ رێكێ ب هه‌مى خه‌لكێ هه‌رێما كوردستانێ بده‌ت ده‌ربڕینێ ژ مافێ خۆ یێ ده‌نگدانێ بكه‌ت".
بالیۆزێ ئێكه‌تیا ئه‌ورۆپا: هه‌لبژارتنان سه‌ربێخن
ڤیله ڤاریۆلا، بالیۆزێ ئێكه‌تیا ئه‌ورۆپا ل ئیراقێ سه‌را سه‌رۆكێ هه‌رێما كوردستانێ دا و گۆت: "من كۆمبوونه‌كا نموونه ل گه‌ل سه‌رۆك نێچیرڤان بارزانى كر، پێشوازیێ ل دیاركرنا رۆژا كرنا هه‌لبژارتنێن په‌ڕله‌مانێ كوردستانێ ل 25-2-2024ێ دكه‌م، دڤێت هه‌مى ئالیه‌ك پێكڤه كارى بۆ وان هه‌لبژارتنان بكه‌ن و سه‌ربێخن.
بالیۆزا ئهمریكا: هه‌لبژارتن بنه‌مایێ هه‌ر دیمۆكراسیه‌ته‌كا ساخله‌من
ژ ئالیی خۆڤه ئه‌لینا رۆمانۆسكى، بالیۆزا ئهمریكا ل ئیراقێ پێشوازى ل دیاركرنا رۆژا هه‌لبژارتنان ژ ئالیێ نیچیرڤان بارزانى ڤه كر و دیاركر، بالیۆزخانه‌یا ئهمریكا ل به‌غدا و كونسلخانه‌یا گشتى یا ئهمریكا ل هه‌ولێرێ پێشوازیێ ل دیاركرنا رۆژا هه‌لبژارتنان دكه‌ت.
بالیۆزا ئهمریكا گۆتژى: هه‌لبژارتنه‌كا ئازاد، دادپه‌روه‌ر و د ده‌مێ خۆ دا بنه‌مایێ هه‌ر دیمۆكراسیه‌ته‌كا ساخله‌من.
بریتانیا: هانا هه‌مى ئالیان ده‌ین كو ب شێوه‌یكێ بونیاتنه‌رانه پشكداریێ د هه‌لبژارتنان دا بكه‌ن
هه‌ر دوهى ئێڤارى كونسلخانه‌یا بریتانیا ل هه‌ولێرێ پێشوازى ل بڕیارا سه‌رۆكێ هه‌رێما كوردستانێ كر و راگه‌هاند، بریتانیا به‌رده‌وام داخوازكریه هه‌لبژارتن ب شێوه‌یكێ ئازادانه و دادپه‌روه‌رانه و گشتگیر بهێنه كرن و هانا هه‌مى ئالیان دده‌ین كو ب شێوه‌یكێ بونیاتنه‌رانه پشكداریێ د هه‌لبژارتنان دا بكه‌ن و گۆت: ئالیین په‌یوه‌ندیدار پشتراستبن هه‌لبژارتن د ده‌مێ خۆ دا بهێنه كرن و ده‌لیڤه‌یه‌كا گرنگه بۆ خه‌لكێ كورستانێ بۆ تێكهه‌لبوون د پرۆسه‌یا دیمۆكراسى و به‌رجه‌سته‌كرن و بكارئینانا مافێن ده‌نگدانێ دا.
سه‌رۆكاتیا هه‌رێمێ ئالیێن فه‌رمى بۆ هه‌ڤكاریێ ل گه‌ل كۆمسیۆنا هه‌لبژارتنان راسپاردن
سه‌رۆكاتیا هه‌رێما كوردستانێ ژڤانێ هه‌لبژارتنێن په‌ڕله‌مانێ كوردستانێ دیاركر و داخواز ژ ئالیێن فه‌رمى یێن هه‌رێما كوردستانێ كر ل گه‌ل كۆمسیۆنا بلندا سه‌ربخۆ یاهه‌لبژارتنێن ئیراقێ كر به‌رهه‌ڤیان بكه‌ن.
دلشاد شه‌هاب، په‌یڤدارێ سه‌رۆكاتیا هه‌رێما كوردستانێ د كۆنگره‌یه‌كێ رۆژنامه‌ڤانى دا راگه‌هاند، 25-2 یا سالا بهێت هه‌لبژارتنێن په‌ڕله‌مانێ كوردستانێ دێ هێنه كرن و داخواز ژ ئالیێن فه‌رمى یێن هه‌رێما كوردستانێ كر ل گه‌ل كۆمسیۆنا بلندا سه‌ربه‌خۆ یا هه‌لبژارتنێن ئیراقێ به‌رهه‌ڤیان بكه‌ن.
دلشاد شه‌هاب گۆت: ب فه‌رمانا سه‌رۆكاتیا هه‌رێما كوردستانێ مه‌رسوومه‌ك هاتیه ده‌رخستن و تێدا هاتیه 25-2-2024ێ هه‌لبژارتنێن په‌ڕله‌مانێ كوردستانێ دێ هێنه كرن و هه‌موو ئالیێن په‌یوه‌ندیدار راسپاردن ل گه‌ل كۆمسیۆنا هه‌لبژارتنێن ئیراقێ به‌رهه‌ڤیان بۆ كرنا هه‌لبژارتنان بكه‌ن و دوپاتكر، هه‌ر ژ ئه‌ڤرۆ ئه‌و بریار دێ كه‌ڤیته د وارێ بجهئینانێ دا و دێ ل رۆژنامه‌یا وه‌قائیع یا كوردستانێ به‌لاڤ بیت.
هه‌روه‌سا دیاركر، گه‌له‌ك بزاڤ هاته كرن ب زووترین ده‌م هه‌لبژارتنێن په‌ڕله‌مانێ كوردستانێ بهێنه‌كرن، بزاڤێن سه‌رۆكاتیا هه‌رێما كوردستانێ رژد بوون هه‌لبژارتن د ده‌مێ خۆ دا بهێنه كرن، لێ ژ روویێ ته‌كنیكى ڤه بۆ كۆمسیۆنێ یا ب ساناهى نه‌بوو.
سه‌رۆكاتیا هه‌رێما كوردستانێ وه‌ك هه‌رده‌م بزاڤ كر ب ئێك ده‌نگ رۆژا هه‌لبژارتنان بهێته دیاركرن سه‌رۆكاتیا هه‌رێمێ سه‌ره‌دانا هه‌موو ئالیان كریه و په‌یوه‌ندى ب وان كریه.
