سه‌رۆك نێچیرڤان بارزانى پێشوازیێ ل نادیا موراد دكه‌ت
بەلاڤ بکە
گاڤ
سه‌رۆكێ هه‌رێما كوردستانێ راگه‌هاند كو هندى ره‌ڤاندیه‌كێ ئێزدى مابیت دێ بزاڤ بۆ رزگاركرن و دیاركرنا چاره‌نڤیسێ وان به‌رده‌وام بیت.
سه‌رۆك نێچیرڤان بارزانى ئه‌ڤرۆ پێنجشه‌مبیێ پێشوازى ل نادیا موراد چالاكڤانا ئێزدى و هه‌لگرا خه‌لاتێ نوبێل بۆ ئاشتیێ و سه‌رۆكا رێكخراوا ده‌ستپێشخه‌ریا نادیا كر.
سه‌رۆكاتیا هه‌رێمێ به‌لاڤكریه؛ د دیداره‌كێ دا، هه‌ردو لایان ره‌وشا ئێزدیان و پرۆسێسا ڤه‌گه‌ڕیانا ئاواره‌یێن ئێزدى ژ كه‌مپان بۆ وارێن خۆ ل شنگالێ و ده‌ڤه‌رێ، رۆلێ رێكخراوێن نێڤده‌وله‌تى بۆ هاریكاریا ئێزدیان و رێوره‌سمێن دوهى یێن ڤه‌كرنا مونۆمێنتا قۆربانیێن ئێزدى ل شنگالێ به‌حسكرن.
هه‌ردو لایان، ل گۆره‌ى به‌یانا سه‌رۆكاتیێ، دوپاتى ل سه‌ر گرنگیا هه‌بوونا ئارامى و سه‌قامگیریێ بۆ ده‌ڤه‌رێن ئێزدیان كر دا كو ئاواره‌یێن ئێزدى بشێن ڤه‌گه‌ڕنه‌ڤه ده‌ڤه‌رێن خۆ، هه‌روه‌سا به‌حس ل ئالنگاریێن هه‌مبه‌ر جڤاكێ ئێزدى و چه‌وانیا هاریكاریا وان كر و سوپاسیا وان وه‌لاتان كر یێن ب هه‌ر شێوه‌یه‌كێ هاریكاریا ئێزدیان دكه‌ن.
سه‌رۆك نێچیرڤان بارزانى زێده‌بارى ده‌ستخۆشیێ ل ئه‌نجامدانا رێوره‌سمێن دوهى یێن سالڤه‌گه‌ڕا قۆربانیێن ئێزدى، دوپاتى ل سه‌ر گرنگیا دێكیۆمێنتكرنا تاوانێن داعش به‌رانبه‌ر ئێزدیان و بزاڤكرن بۆ رێگرتنێ ل دوباره‌بوونا وان تاوانێن كر.
د ته‌وه‌ره‌كێ دى دا، سه‌رۆكێ هه‌رێمێ دوپاتكر كو هندى ره‌ڤاندیه‌كێ ئێزدى مابیت، دێ بزاڤ بۆ رزگاركرن و دیاركرنا چاره‌نڤیسێ وان به‌رده‌وام بیت.
