رێبەر کوردۆ

ل ڕۆژێن دەربازبووی و ل گەل لەهییان بەرپرسێن پارێزگەها دهۆکێ نموونەیەکا جودا بەرچاڤ کر، جارەکا دی روحا مرۆڤێ کورد یا دلنزمییێ و هاریکارییێ دیار کر. خۆزی ئێدی تەوازعا بەرپرسان بیتە نەریت و پشتی ئەڤان رویدانان ژی هەر یا بەردەوام بیت، دا ئەو ئیمۆژییێ د سەرێ مەدا چێبووی، کو بەرپرس ئانکو مۆنیکا و زێرەڤان و ژیانەکا جودا بهێتە گوهۆڕین بۆ خزمەت و تەوازعێ، خەلکی هوین وه‌سا دڤێن لەوڕا باشتر و پتر ل گەل خەم و ژان و پێدڤیێن خەلکێ خۆ بن. ئەڤە سروشتێ مرۆڤێ کوردە نە قەبویل دکەت ئەو د سەر ئێکێڕا بیت و نە ژی قەبویل دکەت ئێك د سەر ویڕا بیت! ژبەر هندێ ژی، کورد ب درێژاهییا دیرۆکێ ب حالەتێن دەگمەن و کێموێنە نەبن نەچووینە د رێککەڤتنەکێ دا ببنە کۆلەیێن یێ دی یان ژی ئێك بیتە کۆلەیێ وی، لەوڕا ژی هەتا نوکە ل گەل نەتەوەیێن دەردۆرا خۆ پێکئینا گەلی چێنەکرییە، سەرەرای ئەوێ چەندێ ژی هەردەم ئەوان بزاڤکرینە ب دارێ زۆرییێ کوردان بکەنە پشکەك ژ گەلێ خۆ، بەلێ کوردان هەردەم شەڕێ ئەڤێ بزاڤێ کرییە و هەتا نوکە ئەو شەڕە بەردەوامە! ئەڤجا دا ئەڤ خەلکە تە قەبویل بکەت، دڤێت وی هەستێ ئەز ژ تە بلندتر و باشترم د خۆ دا نەهێلی و هەستێ ئەم وەکو ئێکین و مە برین و ژان و ئارمانجێن هەڤپشك هەنە بیتە پەیرەوێ ژیانێ.

سەعدییێ شیرازی دگۆت: مرۆڤ د کۆکا خۆدا ژ ئاخێ چێبوویە، لەوڕا ئەگەر یێ دلنزم و متەوازح نەبیت ل گەل وێ ئاخێ دبیتە تشتەکێ دی.