رزگار حەمید شەریف

پشتی نێزیک ٢١ سال ژ دەستهەلاتدارییا پارتییا ئاکەپێ ب رێبەرییا ئەردۆگانی و برنا نێزیکى ١٧ هەلبژارتن و ریفراندۆمان، دوهی ڤێ پارتیێ شکەستنێن مەزن یێن هەلبژارتنێن باژێرڤانییان ب دەستڤە ئینان ب ٣٥.٥٪  ب پاشڤەکێشانا ٧٪  و پارتییا جەهەپێ یا کو سەر دەستێ ئەتاتورکی هاتی ئاڤا کرن بوویە پارتییا ژمارە ئێک ل سەر ئاستێ هەمی تورکیا ب ٣٧.٥٪ ب پێشڤەچوونا ٨٪.

دڤان هەلبژارتنان دا چەندین سوپرایز هاتنە پێش. سوپرایزا ژ هەمیان مەزنتر ئەو بوو کو به‌ربژارێن جەهەپێ ل ئیستەنبۆلێ(١٨٪ ژ نفوسا تورکیا) و ئەنقەرێ (٥٪ ژ نفوسا تورکیا) شیان ژ به‌ربژارێن ئاکەپێ ب ٥١٪ و ٦١٪  ببەن ب جوداهییه‌كا مەزن. سوپرایزا دوویێ ئەو بوو کو پارتییا فاتیح ئەربەکان کورێ سەرۆکێ بەرێ یێ پارتیا ئەردۆگانی،  نەجمەدین ئەربەکان،  ب ٦٪ ژ دەنگێن گشتی بر. سوپرایزا سیێ ئەو بوو کو پارتییا پرۆ کوردی دەم پارتی شیا سەرکەفتنەک مەزن ل باکورێ کوردستانێ تۆمار بکه‌ت ب برنا سێ پاژێرێن مەزنێن کوردان ئه‌و ئامەد، مێردین و وانێ و ٧ پارێزگەهان و ٦٥ باژێرۆکان.

کوردێن باکۆر و ب تایبەتی دەم پارتی هەول دا کو ل باژێرڤانیێن مەزن وەک ئیستەنبۆل و ئەنقەرێ دەنگێ خۆ بدەنە به‌ربژارا جەهەپێ و ئاکەپێ بشکێنن. هەروەسا ژ بۆ برنا به‌ربژارێ جەهەپێ ل ئیستەنبولێ دەم پارتییا کوردان به‌ربژارا خۆ یا ب هێز خاتوو باشاک خێزانا سەلاحەدین دەمیرتاش ژ به‌ربژاریێ ڤەکێشت کو چاڤەڕێ دهاتە کرن زێدەتر ژ ملیۆنەک دەنگێن کوردان و چەپان دەستڤە بینیت. دەم پارتی هەروەسا جارەکا دی چەندین سیاسەتمدارێن کەڤنێن خۆ وەک لەیلا زانا و ئەحمەد تورک بۆ بانگەشەیا هەلبژارتنان ب کار ئینان بۆ زێدەکرنا دەنگێن خۆ و ئاشتی کرنە سلۆگانێن خۆ.

دەنگێن کوردان شیان پارتییا ئەردۆگانی ل ئیستەنبۆل و ئەنقەرێ بشکینن و چاڤەڕێ دهێته‌ کرن کو ئەردۆگان بۆ تولڤەکرنێ وەک بەری نوکە توندتر بیت. دپێنگاڤا ئێکێ دا وێ دیسان ب تۆهمەتا تیرۆرێ بەرپرسێن کاریزماتیکێن دەم پارتی بێختە زیندانێ دا و هێرشێن تورکیا بۆ سەر بارەگه‌هیێن پ ک ک و یەپەگێ ل کوردستانا ئێراقێ و سوریا زێدە بکه‌ت و دیتنا ئۆجەلانی ژیک بکەتە خەون و بەردەوام بە دانانا قەیومان ل جهێن شارەدارێن کوردان. و د ئێکەم داخویانی دا سەرۆکێ تورکیا گۆت وێ بەردەوام بن ل سەر شەڕێ تیرۆرێ ل سوریا و ئێراقێ.

هەلبژارتنێن باژێرڤانییان نەخشەیا سیاسیا تورکیا گوهارتن و سۆسیال دێمۆکرات و کوردان برن  و نەژادپەرەست و ئیسلامییان دۆراندن و پێشبینی دهێته‌ کرن کو ژ ڤێ ئەگەرێ هەلبژارتنێن بەروەخت یێن سەرۆکاتییا کۆمارى  ببە رۆژەڤە تورکیا و بەلکی ژ ڤێ ئەگەرێ سەرۆکێ نوکە یێ تورکیا بەری ٢٠٢٨ ژ سەر کورسیێ سەرۆک کۆماری بکەڤیت. لێ پرسیار ئەوە کو ئایا پارتییا جەهەپا ئەتاتورکی کو ب دەنگێن کوردان ل گەلەک باژێران سەرکەفتن وێ حەز و ڤیانا چارەیا پرسا کورد هەبن و بشێن رێگریێ ل دەینانا قەیومان بکەن؟!