مەرڤان بۆتانى

هوسا جارەکێ ئەم کۆمەکا کەسوکار و دۆست و هەڤالان ل جييەکى ل هەڤ کۆمببوون، كو ئەم دەردۆرا بیست سیهـ حەبەکان بوون و هوون دزانن ژى كو ئێدى ژ مە کوردان رە بوويە (عەدەت) كو هەر گاڤا مە دوسێکەکان سەرێ خوە دا هەڤ و مە ب هەڤڕە قاوەیەک يان چایەک ڤەخوار، یەکسەر ئەم هەموو دبنە  سیاسەتڤان و ئەم  سیاسەتا ژدەرڤە و هوندر ژى شرۆڤەدکن. داوى  جار كو ئەم ل هەڤ جڤیاین، سوحبەت سوحبەتا کەکێ نێچیر بوو، مەبەست سەرۆک نێچیرڤان بارزانى، یەک ژ حازران کو عەمرێ وى شێست سال دەربازکربوون، هەما هۆ ب گوندیكانى رابوو سەر خوە و گۆ؛ ئەز ژ ئەڤى کەسى حەزدکم، سەرۆک بە یان نە سەرۆک بە، ئەوى جامێرى دەوامى دا گۆتنا خوە و گۆ؛ کەکێ نێچیر کەسەک هەستيسڤک و زمانخوەشە و پتریا جاران دەڤ بکەنە ژى و مرۆڤ وسا تەخمیندکە کو نێچیر کەسوکار و خزم و مرۆڤێ مە تەڤانە، راستە نە خێرا وى گەهایە من نە ژى ( خرابى) یا وى، لێ ئینسانێ قەنج و بکێرهاتى ژ ڤر و مالا خودێ خويايە.

ب هەر حال مژارا مە يا وێ جڤینێ بوو کەکێ نێچیر و من ب خوە ژى پاش كو گوهداریا رایا هەموو حازران ئێن کو ئاخڤین کرى، من ژى هوسا رایا خوە گۆ: د نها دە، تایبەت پاش کو رەوش ژ هەموو ئاليەکێ ڤە تەڤ ل هەڤ بووى و سەروبەرێ خەلکى ژى سەروبن بووى و حزبێن کوردان ژى هەر یەک ژ ئالیێ خوە ڤە دبێژە ئەز و کەسێ دن نە و پاش کو تێکەلییێن کوردان ب ژدەرڤە ژى ل همبەر بەرێ پر کێمبووين، سەرکردە و دپلۆماتکارەکێ وەکا کاک نێچیر ژ ئەڤێ رەوشێ رە گەرەکە و ئەگەر هوون بێژن چما، وەکا بەرسڤ ئەز دبێژم ئەو ئاوایێ سەرەدەریکرنێ ئێ کو كاك نێچیر ب هەموو حزب و ئالیێن دن ئێن سیاسى رە دکە، سەرەدەریکرنەکا هشمەند و پڕى زانەبوونە، ب من وەرە ئەو کەس بەلکو نها ئێکانە کەسە کو دەما كارێ خوە دکە و ب حزب و کەسێن دن ئێن سیاسى رە دجڤە مروڤ قەت هەستناکە کو ئەڤ کەس ژ ئەڤێ پارتییێ یان ژ پارتییا هەنێ یە، لێ پتر وەکا سەرۆک و خوەدى و خزمەتکارێ تەڤان خویادبە و هەلبەت سەرکردێ دورست ژى دڤێت هوسا بە، و ژبلى ئەڤێ یەکێ ژى گۆتارا وى یا هەرێمی و هەروسا یا جیهانى ژى گۆتارەک ژیر و کویرە، واتە جامێر باش هزرا خوە د نها و سوبە دە ژى دکە و ژنوو دئاخڤە، ئانکو گەر ئەز ب زمانێ شرۆڤەکاران بئاخڤم کەکێ نێچیر دپلۆماتکارەکێ سەردەميانەیە و دزانە هەر گۆتن و هەر کریار بکێرى كیش جهى و کەنگى تێ.

ل داویێ تشتێ ئەز دخوازم بێژم، دەربازبوون ژ ئەڤێ کریزێ، چ ل سەر ئاستێ هوندر و نەپێککرنا کوردان بە چ ل سەر ئاستێ هەرێمێ و نێڤدەولەتى ژى بە کەسەکێ وەکا کاک نێچیرڤان بارزانى زەرورەتە و سوبەيەکا نێزیک ژى دێ ئەڤێ گۆتنا من بسەلمینە.