خورشید ئەحمەد سورچی

پشتی کو ل رۆژا 18ى دیسەمبەرێ هەلبژارتنێن جڤاتێن پارێزگەهێن ئیراقێ ب پشکداریا 6 ملیون ئیراقیان برێڤەچووین و ل رۆژا 19ى هەیڤێ ئەنجام هاتینە بەلاڤکرن، بۆ مە دیاربوو کو هێزێن نزیکی ئیرانێ شیان بسەرکەڤن، ب ڤێ چەندێ ژی دەستهەلاتا ئیرانێ دناڤ ئیدارەیا پارێزگەهێن ئیراقێ دا دێ زێدەتر لێهێت، هەر ئێک ژ نووری مالیکی و هادی عامری و قەیس خەزعەلی سەرکەفتیێن ئێکێ نە د هەلبژارتنێن جڤاتێن پارێزگەهێن ئیراقێ دا کو ئەڤە ژی پەیامەکا رۆن یا سیاسی بۆ مە دیار دکەت کو ئێدی ئیران هەژموونا خۆ یا سیاسی نە ب تنێ ژ مەرکەزی بەلکو دناڤ ئیدارە و پارێزگەهێن دی دا ژى دێ نیشا ئەمریکا و تورکیا و کەنداڤێ عەرەبی دەت.

ئیران د پارێزگەهێن باشوورێ ئیراقێ دا بسەرکەڤت، هەروەسا ل کەرکوکێ ژی ئیران شیا مەترسیێ ل سەر پێگه‌هێ تورکیا پەیدا بکەت کو تورکیا هەر گاڤ کەرکووک وەک ویلایەتەکا دەولەتا عوسمانی ددانا، د ڤان هەلبژارتنان دا دو پرسێن گرنگ پەیدا دبن ئەو ژی (دەستهەلاتدارێن لایەنگرێن ئیرانێ شیان ب سەر ریفۆرمخوازێن شیعی و ب تایبەت سەدری بسەرکەڤن و پرسا دوێ هەژموونا ئیرانێ ب سەر هەژموونا تورکیا کەفت)، لەورا د شیان دایە بێژین کو جارەکا دی ئیران شیا د گۆڕەپانا ناکۆکیێن ئه‌قلیمى دا بسەرکەڤیت.