رزگار حەمید شەریف

ئەڤرۆ سەرۆکێ دادگەها فیدرالی کو بەرپرسە ژ چەسپاندنا دەستوورێ ئیراقێ لگەل شاندەکا پارێزگەها ئەنبار، چێکرنا هەرێمێن نوی رەتکر و دژی ئێکەتیا ئیراقێ دیت. هەروەسا دڤێ دیدارێ دا ناڤبری گۆت "هەرێما کوردستانێ بەری ئازادکرنا ئیراقێ تایبەتمەندیا خۆ هەبوو و مە ژی ژ نەچاری قەبویل کر". دێ د چەند خالان شرۆڤەیا ڤێ بیرۆکەیا فایق زێدانی دەم.

د خالا ئێکێ دا ئیراق ل گۆرەی دەستووری، ولاتەکێ فیدرالیە و د برگا ئێکێدا هاتیە کو پێگیری ب بەندێن دەستووری یە، گەرەنتیا پاراستنا ئێک پارچەئییا ئیراقێ یە. هەروەسا دەستوورێ ئیراقێ رێکێ ددەت کو چەند پارێزگەهـ هەرێمەکێ بۆ خۆ دامەزرینن و رێکار ژی د دەستووری دا هاتینە دیارکرن.

خالا دویێ ئەوە دادگەها بلندا دەستووریا ئیراقێ، ل گۆرەی دەستووری دەستگەهەکا چاڤدێری و سەربخۆیە و ل گۆرەی بەندێن دەستووری، رۆهنکرن و بریارا ددەت. فایق زێدان و دادوەرێن دی، پێدڤیە سەربخۆیا خۆ بپارێزن و نە کەڤنە بن هیچ گڤاشتنێن سیاسی. د ئەسلدا زێدانی و هەڤکارێن وی مافێ داخویانی و دیدارێن سیاسی و ئولی و عەشایری نینن و نابیت وەک ئەم دبینن پشکداریا سالیادێن سیاسی و کلتووری ببن.

ئەگەر فایق زێدانەک کو پاراستنا دەستوورێ فیدرالێ ئیراقێ کارێ وی یێ  سەرەکی بیت، وەسا بێ پەردە فیدرالیزمێ ب ئێکجاری رەتبکەت و ژ چارچووڤێ ئەرکێ بۆ هاتیە دەستنیشانکرن، دەربکەڤیت و ل دژی داخوازیێن خەلکێ ئیراقێ راوەستیت، باشە مە وەک کوردان چ باوەریەک ب دام و دەستگەهێن دی یێن دەولەتا عئیراقێ وەک پەرلەمان و وەزارەتێن بەرەڤانی و ناڤخۆ و دارایی و نەفتێ  هەبیت، دلۆڤانیێ ب گەلێ هەرێما کوردستانێ ببەن!؟!.

داخویانیێن سەرۆکێ دادگەها بلند نابیت بێ هەلویست ژ پەرلەمانتار و وەزیر و ب تایبەتی سەرۆککۆمارێ ئیراقێ دەرباز ببن. فایق زێدان هەروەسا دیار دکەت کو وان کاودانەکا نەساخلەم یا کوردان ژی وی ئاوایی قەبول کریە و ل باوەریا مندا هەر دەمەک دەرفەت بۆ نموونەیێن وەک زێدانی دروست ببیت، دێ ب هێز هێرشی هەرێما کوردستانێ کەن و هەولا ژناڤبەرا مە دەن.