رزگار حەمید شەریف

پشتی دیدارێن گرنگ یێن سەرکرده‌یێن هەرێما کوردستانێ ل داڤۆس، حەفتییەکا پڕ بزاڤێن دپلۆماسی ب سەرادانا سەرۆک کۆمارێ ئه‌رمه‌نستانێ بۆ هەولێر و ڤەخواستن و پشکدارییا سەرۆکێ هەرێمێ ل دیدارا دپلۆماسی  یا ئەنتالیا ل تورکیا Diplomacy Forum  Antalya و سەرۆکێ وەزیران بۆ واشنتۆن، گرنگییا پێگەهێ هەرێما کوردستانێ ل سەر ئاستێ نێڤدەولەتی دیار کر، سەرەرای بزاڤا کێمکرنا ڤى قەوارى ژ ئالیێ دادگەها فیدرال یا ئێراقێ ب فەرمانا فەیلەقا قودسا سوپایێ پاسدارێن ئیرانێ.

سالا ٢٠٢٤ ب هێرشا مووشەکی یا سوپایێ پاسدارێن ئیرانێ ل 15-1-2024 بۆ سەر هەولێرا پایتەخت دەستپێکر کو بوو ئه‌گه‌ر 4 سڤیل ژیانا خۆ ژ ده‌ست بده‌ن، سەرۆک وەزیرێن هەرێمێ شیا دماوێ ٢٤ دەمژمێران دا ژ ڤێ بوویەرا دلتەزین کاربەدەستێن مەزنێن ئەمریکا ژوان وەزیرێ دەرڤە بلینکن و شیره‌تكارێ ئاساییشا  نیشتیمانییا ئەمریکا و بەرپرسێن پلە بلدێن ئەورۆپا ل داڤوس ببینن و پشته‌ڤانیا وان بۆ قەوارەیا هەرێمێ ب دەستڤە بینیت. هەر ل پاییزا ٢٠٢٣ ئیدارەیا بایدنى مژیلی رێکخستنا هاتنا سەرۆک وەزیرێن هەرێمێ بۆ واشونتون بوون، لێ ژ بەر ئامادەبوونا مەسرور بارزانی ل داڤوس و هێرشێن بالستی ل سەر هەولێرێ و رێکخستنا ئیرانێ یا هێزێن ئێراقێ بۆ دەرکرنا ٢٥٠٠ سەربازێن ئەمریکا ژ ئێراقێ و سووریا و هێرشا "کتائب حزب اللە" بۆ سەر بنگەهێ لەشکری یێ ئەمریکا ل سەر سنۆرێ ئوردن و کوشتنا ٣ سەربازێن ئەمریکی و بریندارکرنا نێزیک ٣٠ کەسان، ئەمریکا سەرادانا مەسرور بارزانی پێش سەرادانا سەرۆک وەزیرێن ئێراقێ، سوودانی ئێخست و ب فەرشا سۆر پێشەوازیا وی کر.

شۆشش ئیسماعیل وەزیرێ پێشمەرگه‌یى ژ پشکا ئێکەتیێ ژی ئێک ژ ئەندامێن گرنگ یێ شاندا مەسروور بارزانی بوو، کو بالا چاڤدێرێن سیاسی بۆ خۆ ڤەکێشا. ئێک ژ تێبینیێن ئیدارەیا بایدنى نەئێکگرتنا هێزێن پێشمەرگە بوویە و رێفۆرمێن هێدی یێن وەزارەتا پێشمەرگەى. په‌یڤدارێ وەزارەتا دەرڤە مەسیو میلەر دیار کر کو دکۆمبوونا وەزیرێ دەرڤە ل گەل مەسرور بارزانی دا بەحسا، ئاساییشا ناوچەیێ و بهایێن هەڤپشک( مافێ مرۆڤ، ئازادیا بیر و بوچوون و دیمۆکراسیێ) و رێڤەبەرییا ساخلەم و رەوشا مافێن مرۆڤان ل هەرێما کوردستانێ هاتیەکرن.

هێرشا ٧ ئوکتوبەرا حەماسێ بۆ سەر ئیسرائیل، بوویە خالەکا ڤەگەریانێ ل سەر سیاسەتا دەرڤە یا ئەمریکا ل رۆژهەلاتا ناڤین و گرنگی دانا ڤێ ناوچێ د سیاسەتا دەرڤە یا ئەمریکا دا، ئەڤ بوویەرە ژی ده‌لیڤه‌یه‌كا باش بوو بۆ هەرێما کوردستانێ کو بۆ ئەمریکا دیار کەت کو بێى پشته‌ڤانیا هەرێما کوردستانێ دێ شیعەیێن ئێراقێ و عەلەویێن سووریا ب چەپلەرێزان وان ژ دەڤەرێ دەرکەن. لەوا تۆنی بلینکن، وەزیرێ دەرڤە د دیدارا ل گەل مەسروور بارزانی دا گۆت: ئەمریکا پشته‌ڤانییا هەرێما کوردستانەکا خوەراگر دکەت وەک بەرێ بناغێ پەیوەندیێن ستراتێژی یێن واشنتۆن ل گه‌ل بەغدا، هەروەسا ئەمریکا ل سەر بەغدا فەرزکریە کو دکۆمبووا پەیمانا ئاساییشا ناڤبەرا واشنتۆن و بەغدا دا دڤێت نوینەرێ هەولێرێ ژی هەبیت.

ئیرانێ شیایە تا نوکە ب رێکا دادگەها فیدرال گڤاشتنێن توندیێن سیاسی، ئابوری و ئاسایش و سەربازی بێختە سەر هەرێمێ. لێ ل داویا رۆژێ دا پارێ فرۆشتنا پەترۆلا ئێراقێ دچتە سەر ژمارەیەکا بانکا ئەمریکا ل نیۆیۆرک ل ژێر فەرمانا وەزارەتا گەنجینه‌یا ئەمریکا کو ئامرێزەکێ ب هێزە بۆ گڤاشتنا ئەمریکا ل سەر ئێراقێ بۆ پشته‌ڤانیا هەرێما کوردستانێ.

بزاڤێن دیپلۆماسییێن سەرۆکێ هەرێمێ و سەرۆک وەزیران ل گەل دلساخی و خوەراگرییا گەلێ کوردستانێ بوویە ئەگەرێ ئەنجامێن بەرهەمدار بۆ گەلێ هەرێما کوردستانێ کو دێ ل هەیڤێن داهاتی زێدەتر دیار بیت و رێگرییا ئەمریکا ل بزاڤێن کێمکرنا رۆلێ هەرێما کوردستانێ ل ئێراقێ، د نوکە دا هەرێم ستراتێژییا ئەمریکایە د رەسمێ سیاسەتا دەرڤەیا ئەمریکا دا ل عێراقێ.