سەرهلدان و براندسازێن نەتەوەیی و نیشتیمانی
بەلاڤ بکە
کاوار نێروەیی
ئێک ژ ئارمانجێن مەزن و گرنگێن سەرهلدانێ، دروستبوونا شوناسەکێ نەتەوەیی و نیشتیمانی یە، ژبو قوناغا دوویڤ دا و بەردەوامیدانا پرساخۆ د پروسەیا سیاسی و نەتەوەسازی و دەولەتسازییێ دا ئەو سەرکردێ نیشتیمانی رولگێر و ئاراستەکەر و لێڤەگەر بیتن…
پشتی هەر قوناغەکا مێژوویی یا مەزنا نەتەوەیان و چونا دناڤا قوناغەکا نوی دا، گرنگە هزر د دروستبوونا براندێن نەتەوەیی دا بکەن و پرس ژخۆ بکەن “ ئەم کی نە " مە چ دڤێت و یا مە دڤێت چەوا ب گەهینێ ؟
پشتی ژ ناڤچوونا ئێکەتییا سوفیەت، ئێکەم پرسیارا رۆسیا نوی ژ خۆکری ئەوبوو کا "ئەم کینە" رۆسیا وەک وەڵات کیە و چ دڤێت و یامە دڤێت چ بکەتن تا بگەهیتێ وێ ؟
کەواتە دەما بو وەلاتەکێ مینا رۆسیا خۆدان کلتوور و مێژوو یەکا دێرین و خوداناخۆ مێژوویەکا پری شانازا ئیمپراتوریەتێ، ڤان پرسێن دگۆتن دا دسادە و جەوهەردا دتژی، گرنگ بیت و ژ خۆ بکەتن.
بۆ نەتەوەیەکا وەکو مە کوردان بێی سەربورا دەستهەڵات و حکومرانیەت و دەردور هەژمونخواز ب درێژاهییا دیروکێ دوژمن، ببەردەوامی کار لسەر ژناڤبرنا ناسنامەیا کورد و کوردستانی کری.گەلەک گرنگترە ئەم ڤان پرسان ژ خۆ بکەین و ب بەرنامە و میکانیزمێن سەردەم و روحیەتا شورەشگێری کارلسەر بکەین.
چونکە ئەگەر بۆ وەڵاتێن خودان کیانێن سیاسی دروستکرنا ڤێ براندێ نەتەوەیی ژبۆ مان و دروستکرنا هەژموونا خو لسەر وەڵاتێن دونیایێ بیتن.
بو مە وەکو نەتەوەیەکا بێ دەولەت و کیانەکێ سیاسیێ سەربەخۆ، ئەڤرۆ ژ هەر دەمەکێ پێتڤی ترە ل دەردور براندێ خویێ نەتەوەیی و نیشتیمانی کوم ببین، داکو بشێین ڤێ هەرێما تاکە هیڤی و ئومێد بەخشا هەمی کوردێن دونیایێ ب پارێزین و بەرەڤ ئارمانجا مەزننێن سەربخویی و دەولەتبوونێ ڤە ببەین.
