کوردستان و هەلبژارتنەك جودا!
بەلاڤ بکە
ڤەمان فەیسەل
دبیت ل دەستپێکا هەر هەلبژارتنەکێ ئەڤ دەستەواژە (هەلبژارتنەك گرنگ و جودا) دهێتە بکارئینان و چەندە بارە ببیت و رەنگە هنده‌ك جاران ژبەر زێدە گۆتن و بکارئینانێ بۆ دەنگدەری یا بێزارکەر ژی بیت! ژبەرکو ل ناڤ پتریا هەوێن هەلبژارتنێن بۆری دا سوزێن راخستنا سفرەیێن بمینا باخچە و رویبارێن جنەتێ هاتینە دان! لێ دەملدەست پشتی ئەنجامدانا هەلبژارتنان ئەو جامێرێ و ساخاوەت و بەلێ و لەبێ و سەر سەر و سەرچاڤا و رویی گەشی و پێکەنین ژ دویرڤە و سلاڤکرن و بەرسڤدانا تەلەفوون ب ئێک زەنگ و لێبۆرین خواستن د گیروبوونا بەرسڤدانێ دا دبنە هەلم و بەرەف ئەسمانا ڤە فرینە، زێدەباری هندێ هەمی ئەو بەرنامەیێن دناڤ بانگەشێ دا دهێنە راگەهاندن چ بها و نرخێ خۆ نینە تەنانەت 0.0000001% هزر و دیتن و بەرێ خودان لێ ناهێته‌کرن گەلەك کێم یان ب چ رەنگا ناهێنه بجهئینان!
پسیارا سادە ئەڤەیە ئه‌رێ پرۆسێسا هەلبژارتنان یارییا خۆ دەربازکرنێ یە؟ یان گێڕانا دیلان و گوڤەندان و داخوازکرنا سەر زەحفییا و چوونا سەرێ زاڤا و دانا شەباشایە؟ یان ژی مه‌ره‌م ژێ دەستنیشانکرنا هێزەکێ یان چەند هێزەکایە بو ده‌مه‌كێ دیارکری (4 سال) بۆ راستەڕێکرنا ره‌وشا کارگێڕی و باشترکرنا رەوش و ژێرخانا ئابۆری و پێشخستنا سیستەمێ دارایی، پەروەردەیی، بهێزکرنا کەرتی ساخله‌مى، چاندن و ئاڤەدانیێ و حەتا دوماهیێ یە؟
تا نوکە پتریا بۆچوون و دیتنا ئەوە یا د چارچۆڤێ هەر دو پرسیارێن ئێکێ دا یا راست ژی سەرەدەری و پراکتیزەکرنا کاری د هەمان بازنێ دابوویە لەوما ژی هەر نوکە لدویڤ ئامارێن کومسیونا هەلبژارتنان ژ سەرجەمێ (3,789,000) کەسێن مافێ دەنگدانێ هەی (1,005,000) کەسان برێژەیا 27% بریارا بایکۆتکرنێ دان برێکا وەرنەگرتنا کارتێن دەنگدانێ! هزرا مە ئەوە رێژەیه گه‌له‌كه، لێ فەرە ئه‌گه‌رێن سەرڤە یێن ڤێ بڕیارێ بهێنە زانین، بکورتی دێ دڤان خالادا بەحس کین:
خۆ نەدیتن وەک خودان یان ژێدەرێ روح بەخش ب دەستهەلاتێ پالنەرێ هەرە سەرەکییێ ساربوونا هاولاتییانە. بێ گومان ئەڤ دیتن و تێگەهشتنە ب سەربۆر بدەست ڤە هاتییە.
هەبوونا شەرعییەتەکا پیرۆزتر(خەبات) ژ شەرعییەتا دەستووری وەرگرتن ژ وه‌لاتییان پێخەمەت دان و وەرگرتنا بریاران.
لاوازی و بێ ئیرادەییا دەستهەلاتا یاسادانانێ و بێ دەستهەلاتییا وان ل سەر ئەرک و کارێن وان ب تایبەتی وەک چاڤدێر، ئەڤە ژی ژ وێ چەندێ بوویە کو پتریا بەربژێران ڤێ پێنگاڤێ بۆ خۆ وەک ده‌لیڤه و رێکا گەهشتنا پلەداریێ وەرگرتنا پارچە کێکا خۆ دبینن و ئالیێ وان بەربژێر دکەت ڤێ چەندێ بۆ وان وەک ئمتیاز دبینیت!.
تا نوکە ئەگەر رکابەری چەند یا توند بیت لێ د راستی دا ناڤەڕۆکا وان گەلەک ب بها و سەنگین نەهاتییە دیتن و وەرگرن ژبەرهندێ هەر جار لگۆر سەدەمەک گەلەک سڤک کریار و رێکارێن پاشخستن و ئەنجامنەدانا هەلبژارتنان و بسەرڤە برن ژ ده‌مێ قانوونى د هاتنە وەرگرتن، بەلێ دیتنا مە ئەوە ژ بو قۆناغێن بهێت ره‌وش ب تەمامی دێ هێتە گوهۆڕین، تێگەهێ هەلبژارتنا و گرنگییا وێ و پشكدارییا وه‌لاتییان (ئەون خودانێ دەستهەلاتێ) رەنگ و شێوەیەکی گەلەک نوی و جودا دێ وەرگریت ژبەر چەند ئەگەرا:
بۆ ڤێ قۆناغێ قەواره‌یێ هەرێما کوردستانێ دێ دڤی قالبی دا مینیت و یێ پاراستییە هەم ژ رویێ قانوون و دەستووری ڤە، هەم ژی ب پالپشتی و پشتەڤانییا کۆمەلگەها نیڤ دەولەتی و وەلاتێن زلهێز ڤە. ب هەمی کێماسیێن خۆ ڤە باوەر ناکەین ل سەر ڤی رویێ ئەردێ هندە بەرفرهـ ئەڤ نموونا حکومڕانییا کوردی ل سەر ڤێ پارچە جوگرافیا بچویک بهێتە راکرن.
درێژکرن و ده‌م بسەرڤەبرنا خۆلێن پەڕلەمانی بدوماهیک هات، ئێدی هەر ژ ئەنجامدانا هەلبژارتنێن 06/10 ئەڤە سالە ب رۆژ ژمێرا زایینی یا چار سالێن بهێن دێ هێنه دیارکرن بۆ ئەنجامدانا خۆلا دویڤدا.
وه‌لاتى دێ بیتە خودان و ژێدەرێ حەقیقی یێ دانا شەرعیەت و دەستهەلاتێ و خزمەتگوزاری دێ پیڤەرێ هەلسەنگاندنێ و دووبارە و چەند بارە یێ وەرگرتنا باوەریێ بن ژبەرکو ده‌م یێ کورتە و چار سالێن دیڤدا دیسا دێ کەڤیتە بەر دلۆڤانی و شەفەقەیا گشتی و وه‌لاتیان.
