گاڤ

كورتئینان د بودجه‌یا گشتى یا ئیراقێ دا بۆ سالا 2024 زێده‌بوویه‌ و گه‌هشتیه‌ 80 تریلیۆن دیناران ل ده‌مه‌كێ د بودجه‌یا سالا 2023 دا كورتئینان 63 تریلیۆن دینار بوون.

كورتئینان هینگێ د بودجه‌یێ دا رویدده‌ت ده‌مێ قه‌باره‌یێ مه‌زاختنێ ب هه‌مى جۆرێن وێ ڤه‌ زێده‌تر بیت ژ داهاتى ب هه‌مێ جۆرێن وێ ڤه‌.

لژنه‌یا دارایى یا په‌رله‌مانێ ئیراقێ ب سه‌ركردايه‌تییا عه‌توان عه‌توانى ئه‌ڤرۆ چارشه‌مبیێ پێشوازى ل محه‌مه‌د ته‌میم جێگرێ سه‌رۆكوه‌زیرى و وه‌زیرێ پلاندانانێ ژ بۆ به‌حسكرنا گیرۆبوونا هنارتنا خشته‌یێن بودجه‌یا سالا 2024 ژ بۆ لژنه‌یا دارایى یا په‌رله‌مانى كر.

عه‌توانى پرسیاره‌ك ئاراسته‌ى وه‌زیرێ پلاندانانێ كر ل دۆر ئه‌گه‌رێن گیرۆكرنا حكومه‌تێ بۆ هنارتنا خشته‌یێن بودجه‌یا سالا 2024، محه‌مه‌د ته‌میم وه‌زیرێ پلاندانانێ د به‌رسڤێ دا گۆت "لژنه‌یا حكومى یا تایبه‌تمه‌ند ب پێداچوون و هویربینییا خشته‌یێن بودجه‌یێ كار ل سه‌ر كێمكرنا كورتئینانێ دكه‌ت كو 80 تریلیۆن دینارن چونكى ئه‌و كورتئینانه‌كا مه‌زنه‌"، وه‌كى د به‌یانه‌كا عه‌توان عه‌توانى سه‌رۆكێ لژنه‌یا دارایى یا په‌رله‌مانى دا هاتى.

هه‌ر ل گۆره‌ى به‌یانا سه‌رۆكی لژنه‌یا دارایى "سه‌رجه‌مێ بودجه‌یا سالا 2024 گه‌هشتییه‌ نزیكى 228 تریلیۆن دیناران".

ژ لایێ خۆڤه‌، موعین كازمى ئه‌ندامێ لژنه‌یا دارایى یا په‌رله‌مانێ ئیراقێ بۆ گاڤ راگه‌هاند بوو "بۆ مه‌ وه‌ك لژنه‌یا دارایى نه‌یا پێشبینیكرى بوو كو حكومه‌تێ سه‌رجه‌مێ یاسایا بودجه‌یا سالا 2024 ژ 199 تریلیۆن دیناران بۆ 228 تریلیۆن دیناران زێده‌كریه‌، ئه‌ڤه‌ زێده‌كرنه‌كا مه‌زنه‌ ل ده‌مه‌كێ د سالا 2023 دا 142 تریلیۆن دینار هاتبوونه‌ خه‌رجكرن".

ئاماژه‌ ب وێ چه‌ندێ ژى كربوو كو زێده‌كرنا سه‌رجه‌مێ كۆژمه‌یێ یاسایا بودجه‌یێ بوویه‌ ئه‌گه‌رێ زێده‌بوونا رێژه‌یا كورتئینانێ.