ژێده‌ره‌ك: پارتا ته‌قه‌دوم یا محه‌مه‌د حه‌لبووسى چار ئوپشن داناینه
بەلاڤ بکە
گاڤ
ژێده‌ره‌كێ نزیك ژ محه‌مه‌د حه‌لبووسى سه‌رۆكێ پارتا ته‌قه‌دوم راگه‌هاند؛ وێ پارتێ چار ئوپشن داناینه ژ وان ژى خۆڤه‌كێشان ژ پرۆسێسا سیاسى ل ئیراقێ.
ژێده‌ره‌كێ بۆ رۆژنامه‌یا شه‌رق ئه‌لئه‌وسه‌ت راگه‌هاند؛ پارتا ته‌قه‌دوم چار ئوپشن داناینه سه‌ر مێزێ ئه‌و ژى راگرتنا كارى د په‌رله‌مانى دا، خۆڤه‌كێشان ژ حكومه‌تێ، خۆڤه‌كێشان ژ هه‌ڤپه‌یمانییا برێڤه‌برنا ده‌وله‌تێ یان ژى خۆڤه‌كێشان ژ هه‌مى تشتان وه‌كى موقته‌دا سه‌در رێبه‌رێ ره‌وتێ سه‌در به‌رى نزیكى دو سالان كرى.
وى ژێده‌رى گۆت ژى "هێزێن شیعى كار ل سه‌ر دابه‌شكرنا سونه‌یان دكه‌ن و ڤێ چه‌ندێ د به‌رژه‌وه‌ندییا خۆ دا بكاردئینن".
ژ لایه‌كێ دى ڤه، هنده‌ك ژێده‌ران دناڤ چارچووڤه‌یێ هه‌ماهه‌نگییێ دا پێشبینیكرن سالم عیساوى ژ پارتا سه‌روه‌رى یا خه‌میس خه‌نجه‌رى نزیكترین كه‌س بیت بۆ وه‌رگرتنا پۆستێ سه‌رۆكێ په‌رله‌مانى.
ل ناڤه‌راستا هه‌یڤا چرییا دوێ یا سالا بۆرى، په‌رله‌مانێ ئیراقێ ب پشتبه‌ستن ب بڕیاره‌كا دادگه‌ها فیدرالى ئه‌ندامه‌تییا محه‌مه‌د رێكان حه‌لبووسى د په‌رله‌مانێ ئیراقێ دا پشتى سكالایه‌ك له‌یس دلێمى په‌رله‌مانتارێ به‌رێ ل سه‌ر وى ب دویماهیك ئینابوو و تا نوكه په‌رله‌مان نه‌شیایه سه‌رۆكه‌كێ نوى بهه‌لبژێریت.
ل گۆره‌ى په‌یره‌وێ ناڤخۆ یێ په‌رله‌مانى، هه‌ر ده‌مێ پۆستێ سه‌رۆكێ په‌رله‌مانى ژ به‌ر هه‌ر ئه‌گه‌ره‌كى ڤالا ببیت، پێدڤییه سه‌رۆكه‌كێ نوى د ئێكه‌م روینشتنا ل دویڤ دا ب پڕانییا ره‌ها بهێته هه‌لبژارتن، په‌رله‌مانێ ئیراقێ ل رۆژا 13ى كانوینا دوێ یا بۆرى روینشتنه‌كا نه‌ئاسایى بۆ هه‌لبژارتنا سه‌رۆكه‌كێ نوى بۆ په‌رله‌مانى گرێدابوو و تێدا به‌ربژارێ ته‌قه‌دوم شه‌علان كره‌یم پترین ده‌نگ بده‌ستڤه‌ئینابوون ئه‌و ژى 152 ده‌نگ بوون ژ سه‌رجه‌مێ 314 ده‌نگان، ل دویڤ دا سالم عیساوى ل رێزا دوێ هاتبوو ب 97 ده‌نگان و ل دویڤ دا مه‌حموود مه‌شهه‌دانى ب 48 ده‌نگان ل رێزا سیێ هاتبوو، ژ به‌ر بده‌ستڤه‌نه‌ئینانا چ ژ به‌ربژاران بۆ پڕانییا ره‌ها یا پێدڤى، ل به‌ر بوو قووناغا دوێ یا ده‌نگدانێ بهێته كرن، لێ ژ به‌ر بگروڤه‌كێشان روینشتن هاتبوو هه‌لگرتن و تا نوكه ژ به‌ر رێكنه‌كه‌فتنا لایه‌نێن سیاسى و كه‌یسێن ل هه‌مبه‌ر دادگه‌ها فیدرالى روینشتنا هه‌لبژارتنا سه‌رۆكێ په‌رله‌مانێ نه‌هاتیه ته‌مامكرن.
