سه‌ره‌دانا سه‌رۆك نێچیرڤان بارزانى بۆ ئیرانێ و ره‌نگڤه‌دانێن وێ
بەلاڤ بکە
گاڤ
دهێته چاڤه‌رێكرن سه‌ره‌دانا سه‌رۆكێ هه‌رێما كوردستانێ بۆ ئیرانێ ژماره‌یه‌كا ره‌نگڤه‌دانێن ئه‌رێنى د دویڤ خۆ دا بینیت و ژماره‌یه‌كا مفا و قازانجان بۆ هه‌رێما كوردستانێ بده‌ستڤه‌بینیت و چاڤدێر و شڕۆڤه‌كارێن سیاسى ژى رۆل و بزاڤێن سه‌رۆك نێچیرڤان بارزانى د پێشڤه‌برنا په‌یوه‌ندییان دا ل گه‌ل وه‌لاتێن جودا جودا بلند دنرخینن.
كلیله‌ك بۆ ڤه‌كرنا ده‌رگه‌هێن گرتى
سیاسه‌تمه‌داره‌كى ل دۆر گرنگییا سه‌ره‌دانا سه‌رۆكێ هه‌رێما كوردستانێ بۆ ئیرانێ راگه‌هاند؛ ئه‌و سه‌ره‌دانه دێ كلیله‌كێ ژ بۆ ڤه‌كرنا ده‌رگه‌هه‌كێ په‌یدا كه‌ت.
عه‌بدولسه‌لام به‌روارى سیاسه‌تمه‌دار ل دۆر سه‌ره‌دانا سه‌رۆك نێچیرڤان بارزانى بۆ ئیرانێ بۆ گاڤ دیاركر "كێم جاران رویدایه كو هنده‌ك سه‌ره‌دانێن وه‌كى سه‌ره‌دانا نوكه یا سه‌رۆكێ هه‌رێمێ بكه‌ڤنه ل گه‌ل هنده‌ك رویدانێن گرنگ، سه‌ره‌دانه‌كا هۆسا و هه‌ڤدیتنا ل گه‌ل سه‌ركرده‌یێن ئیرانێ نه ژ نشكه‌كیڤه بوویه به‌لكو چه‌ندین هه‌یڤن پلان بۆ هاتیه دانان".
ل دۆر گرنگییا وێ سه‌ره‌دانێ گۆت "مه ژماره‌یه‌كا كێشه‌یان د نوكه دا وه‌كى كێشه‌یا هه‌لبژارتنان و كێشه‌یا مووچه‌یان هه‌یه، سه‌رۆك نێچیرڤان بارزانى ب كه‌سایه‌تییا خۆ و شیانێن خۆ و ب په‌یوه‌ندیێن كویر یێن وى ل گه‌ل به‌رپرسێن ده‌ڤه‌رێ هه‌ین، ئه‌و گونجاوترین كه‌سه بچیت د ڤى ده‌مى دا ڤان بابه‌تان ل گه‌ل ئیرانێ به‌حسبكه‌ت".
زێده‌تر ژى گۆت "ئێك ژ گرنگییێن ڤێ سه‌ره‌دانێ ئه‌وه كو ب داخوازنامه‌یه‌كا فه‌رمى بوویه وه‌كو سه‌رۆكێ هه‌رێما كوردستانێ، ئانكۆ سه‌رۆكێ هه‌رێمێ نیشا خه‌لكه‌كى دا كو سه‌رۆكایه‌تییا هه‌رێما كوردستانێ ده‌زگه‌هه‌كێ نه‌ته‌وه‌یى و یێ نیشتیمانى یه كو هه‌ردو جێگرێن سه‌رۆكێ هه‌رێمێ ژى كو هه‌ر ئێك ژ حزبه‌كا دى یه د سه‌ره‌دانێ دا پشكدارن".
ناڤهاتى د درێژییا ئاخفتنا خۆ دا دبێژیت "ئیرانێ كارتێكرنا خۆ هه‌یه چ ل سه‌ر هه‌رێما كوردستانێ یان ژى ل سه‌ر لایه‌نێن شیعى ل ئیراقێ، ئه‌م باوه‌ر دكه‌ین كو سه‌رۆك نێچیرڤان بارزانى ب شیانێن خۆ وه‌كى (رجل الدولة) وه‌كى ب عه‌ره‌بى دبێژن دێ شێت هه‌ر چ نه‌بیت ب رێكا ڤان دیدارێن ئه‌و ل ئیرانێ ئه‌نجامدده‌ت، كلیله‌كێ په‌یدا بكه‌ت كو ده‌رگه‌هه‌كێ بۆ به‌ره‌ڤ چاره‌كرنا كێشه‌یان ڤه‌كه‌ت".
پاراستنا سه‌قامگیرییێ و به‌رژه‌وه‌ندیێن هه‌ڤپشك
سه‌ره‌دانا سه‌رۆكێ هه‌رێمێ بۆ ته‌هرانێ ب گاڤه‌كا نوى ژ بۆ پاراستنا سه‌قامگیرى و ئارامییێ و به‌رژه‌وه‌ندیێن هه‌ڤپشك دهێته لقه‌له‌مدان.
رۆژنامه‌ڤان نورى بێخالى ل دۆر سه‌ره‌دانا سه‌رۆكێ هه‌رێما كوردستانێ بۆ ئیرانێ بۆ گاڤ گۆت "روانگه‌ها سیاسى و دیتنا سیاسى یا سه‌رۆكێ هه‌رێما كوردستانێ ل سه‌ر ئاستێ هه‌رێما كوردستانێ و ئیراقێ و ده‌ڤه‌رێ پێداگیریكرنه ل سه‌ر سه‌قامگیرییێ، ئاساییشێ، ئارامییێ و په‌یوه‌ندیێن هه‌ڤپشك یێن دوستایه‌تى".
دیار ژى كر "ئێك ژ وان ته‌وه‌رێن سه‌رۆكێ هه‌رێما كوردستانێ د ڤێ سه‌ره‌دانێ دا دوپاتییێ ل سه‌ر دكه‌ت دوباره پشتراستكرنا ئیرانێ و هه‌مى وه‌لاتێن ده‌وروبه‌ره كو هه‌رێما كوردستانێ چ جاران نابیته ژێده‌رێ گه‌فێ بۆ چ وه‌لاتێن جیرانێن خۆ به‌لكو دێ فاكته‌رێ ئارامى، سه‌قامگیرییێ و پێكڤه‌ژیانێ بیت و ده‌ستێ هه‌ڤكارییێ و دوستایه‌تیێ دێ بۆ هه‌مى ده‌وروبه‌رێن خۆ درێژ كه‌ت".
زێده‌تر ژى گۆت "ئیران ژى تێگه‌هشییه كو هه‌رێما كوردستانێ د سالێن بۆرى دا و د پاشه‌رۆژێ ژى دا نه‌بوویه گه‌ف ل سه‌ر ئیرانێ. د سیاسه‌تێ دا، هنده‌ك جاران ئاستێ په‌یوه‌ندییان بلند دبیت یان نزم دبیت لێ ل دویماهییێ سیاسه‌تا كۆنكرێتى و ستراتیژى یا سه‌رۆكایه‌تییا هه‌رێمێ و سه‌رۆكێ هه‌رێما كوردستانێ چونكى پێداگیریكرنه و دوپاتكرنه و باوه‌ریبوونه ب مه‌سه‌له‌یێن ئاساییشێ، سه‌قامگیرییێ و پێكڤه‌ژیانێ، ب پشتراستى ڤه جاره‌كا دى په‌یوه‌ندیێن ل گه‌ل ئیرانێ دێ به‌ته ئاسته‌كێ دى یێ باشتر و بهێزتر ژ روویێن سیاسى، ئابوورى و بازرگانى ڤه".
ناڤهاتى ئاماژه ب وێ چه‌ندێ ژى كر "د سه‌ره‌دانا سه‌رۆك نێچیرڤان بارزانى یا ڤێ دویماهییێ دا بۆ به‌غدا، محه‌مه‌د شیاع سوودانى سه‌رۆكوه‌زیرێ ئیراقێ دیاركربوو كو ل هه‌ر جهه‌كێ بچویكترین كێشه‌یا ژیانێ و ژیارێ یان یا به‌رژوه‌ندیێن خه‌لكێ هه‌رێما كوردستانێ هه‌بیت، سه‌رۆك نێچیرڤان بارزانى به‌رده‌وام ل وى جهى بوویه".
زێده‌تر ژى گۆت "هه‌روه‌سا ئه‌گه‌ر ته‌ماشه‌ى داخۆیانیێن هه‌مى لایه‌نێن سیاسى ل هه‌رێما كوردستانێ بكه‌ین چ ئه‌وێن دناڤ حكومه‌تێ دانه یان ده‌رڤه‌ى حكومه‌تێ نه شایه‌تحالییێ بۆ وێ چه‌ندێ دده‌ن كو سه‌رۆك نێچیرڤان بارزانى ب ئێك مه‌ودا ژ هه‌مى هێزێن سیاسى یێ دویره و ب به‌روڤاژى ژى ب ئێك مه‌ودا ژ هه‌مییان یێ نێزیكه".
خۆیا ژى كر "سه‌رۆك نێچیرڤان بارزانى نوینه‌رایه‌تییا ئیراده‌یا گشتى یا هه‌رێما كوردستانێ ل سه‌ر ئاستێ سیاسى و جڤاكى دكه‌ت و كه‌سایه‌تییه‌كه كو ل هه‌ر جهه‌كێ كوردان ئاریشه، گرژى و كێشه هه‌بن، ئه‌و یێ به‌رهه‌ڤه هه‌مى شیان و بزاڤێن خۆ بۆ به‌رژوه‌ندییا گشتى بكاربینیت".
دوباره ئاڤاكرن و پێشڤه‌برنا په‌یوه‌ندییان
دوباره ئاڤاكرن و پێشڤه‌برنا په‌یوه‌ندیێن هه‌ڤپشك د بوارێن جودا جودا یێن سیاسى، ئابوورى و بازرگانى دا ئێك ژ ته‌وه‌رێن سه‌ره‌دانا سه‌رۆكێ هه‌رێمێ یه بۆ ئیرانێ.
عومه‌ر نوره‌دینى چاڤدێرێ سیاسى ل دۆر سه‌ره‌دانێ بۆ گاڤ دبێژیت "سه‌رۆك نێچیرڤان بارزانى به‌رى نوكه و د نوكه ژى دا دوپاتى ل سه‌ر وێ چه‌ندێ كریه كو هه‌رێما كوردستانێ ب چ شێوه‌یان نابیته گه‌ف ل سه‌ر ئاساییشا ئیرانێ و وه‌لاتێن جیران و گره‌نتى ل دۆر ب ڤێ چه‌ندێ ب ئیرانێ هاتینه دان".
دیار ژى كر "د به‌رانبه‌ر ژى دا، هه‌رێما كوردستانێ ئه‌و داخوازییه هه‌یه پشتراست ببیت كو گه‌ف ل سه‌ر ئاساییشا ناڤخۆیى یا هه‌رێما كوردستانێ ژ لایێ كۆمارا ئیسلامى یا ئیرانێ ڤه نه‌هێته كرن كو به‌رى نوكه پتر ژ جاره‌كا هه‌ولێر هاتیه مۆشه‌كبارانكرن هه‌روه‌سا گه‌ف و مه‌ترسى ژ لایێ كۆمارا ئیسلامى یا ئیرانێ ڤه بۆ سه‌ر ئاساییشا هه‌رێما كوردستانێ هه‌بوون".
گۆت ژى "هه‌روه‌سا هه‌رێما كوردستانێ په‌یوه‌ندیێن ئابوورى و بازرگانى ژى ل گه‌ل ئیرانێ هه‌بووینه، لێ ژ به‌ر هه‌بوونا گرژییان د په‌یوه‌ندییان دا ژ روویێ ئاساییشێ ڤه، ئه‌ڤ په‌یوه‌ندیێن ئابوورى و بازرگانى ژى به‌ره‌ڤ پاشڤه چووینه".
ژ لایێ خۆڤه، كه‌مال ره‌شاد راگرێ كولیژا په‌روه‌رده‌یێ یا ئاكرێ ل دۆر گرنگییا سه‌ره‌دانا سه‌رۆك نێچیرڤان بارزانى بۆ ئیرانێ بۆ گاڤ گۆت "سه‌ره‌دانا سه‌رۆكێ هه‌رێما كوردستانێ بۆ ئیرانێ گرنگییه‌كا مه‌زن ژ روویێن ئابوورى، سیاسى و ئه‌منى ڤه هه‌یه، چونكى ئیران ده‌وله‌ته‌كا گه‌له‌ك گرنگه كو جیرانا هه‌رێما كوردستانێ یه و پێگه‌هێ خۆ ژى ل ده‌ڤه‌رێ هه‌یه، له‌وا گرنگیپێدان ب په‌یوه‌ندیێن باش ل گه‌ل ئیرانێ د ڤێ قووناغێ دا، دێ كارتێكرنا خۆ یا ئه‌رێنى هه‌بیت، هه‌روه‌سا دێ ڤێ سه‌ره‌دانێ كارتێكرنا خۆ ل سه‌ر په‌یوه‌ندیێن مه ل گه‌ل ئیراقێ هه‌بیت، چونكى ب نه‌ئێكسه‌ر ئیرانێ كارتێكرنا خۆ ل سه‌ر حوكمرانییێ ل به‌غدا هه‌یه و ب تایبه‌ت مه چه‌ندین بابه‌تێن ئالۆز هه‌نه كو پێدڤی ب چاره‌سه‌رییێ هه‌نه ل گه‌ل ئیراقێ وه‌كى بابه‌تێن بودجه‌ى و مووچه‌ى و نه‌فت و غازێ".
دوهى ئێكشه‌مبییێ سه‌رۆك نێچیرڤان بارزانى د سه‌ره‌دانه‌كا فه‌رمى دا گه‌هشتبوو ته‌هرانێ و ئه‌ڤرۆ دوشه‌مبییێ په‌یوه‌ندیێن دوقولى و ژماره‌یه‌كا بابه‌تان ل گه‌ل عه‌لى خامنه‌یى رابه‌رێ كۆمارا ئیسلامى یا ئیرانێ، ئیبراهیم ره‌ئیسى سه‌رۆكێ ئیرانێ، حوسێن ئه‌میر عه‌بدولـله‌هیان وه‌زیرێ ده‌رڤه یێ ئیرانێ و عه‌لى ئه‌كبه‌ر ئه‌حمه‌دیان ئه‌میندارى جڤاتا بلند یا ئاسایشا نیشتیمانى یا ئیرانێ ل ته‌هرانێ به‌حسكرن.
سه‌رۆك نێچیرڤان بارزانى د چارچووڤه‌یێ سه‌ره‌دانا خۆ دا بۆ ئیرانێ ئه‌ڤرۆ دوشه‌مبییێ داخواز ژ ئیبراهیم ره‌ئیسى سه‌رۆكێ ئیرانێ كربوو سه‌ره‌دانا هه‌رێما كوردستانێ بكه‌ت.
