گاڤ 
پەرلەمانێ ئیراقێ ئەڤرۆ دێ کۆم بیت و هەلبژارتنا سەرۆکەکێ نوی بۆ پەرلەمانی د کارنامەیا روینشتنێ دا نینە، بەلکو چار خالێن دی د کارنامەیێ دا هەنە.
ل گۆرەی کارنامەیا روینشتنا پەرلەمانێ ئیراقێ یا ئەڤرۆ رۆژا شەمبی رێکەفتی 27-4-2024ێ، ل بڕگەیا ئێکێ یا روینشتنێ، دێ دەنگ ب پێشنیازە یاسایا راستڤەکرنا ئێکێ ژ یاسایا لەشفرۆشییێ یا ژمارە 8 یا سالا 1988ێ هێتە دان کو ناڤەرۆکا وێ گرێدایی کارێن لەشفرۆشی و هەڤرەگەزخوازییێ یە.
د برگەیا دویێ یا روینشتنا پەرلەمانێ ئیراقێ دا، دێ دەنگ ب پرۆژەیاسایا راستڤەکرنا ئێکێ یا یاسایا رێکخستنا ب کرێدانا ئەردێن چاندنێ یێن حکومەتێ ب دەرچوویێن پشکێن چاندنێ و ڤێتێرنەری یا ژمارە 24 یا سالا 2013ێ هێتە دان.
برگەیا سێیێ یا روینشتنا پەرلەمانی دەربارەی پرۆژەیاسایا لێخۆشبوونا هەڤپشک د ناڤبەرا ئیراقێ و کۆریا باشۆر دایە بۆ هەلگرێن پاسپۆرتێن دپلۆماسی کو ژ رێکارێن هاتنوچوونا د ناڤبەرا هەردو وەلاتان دا لێبۆرین بۆ هەلگرێن وان پاسپۆرتان هەبیت.
د برگەیا چارێ و دویماهییێ دا، پەرلەمانێ ئیراقێ دێ خواندنا ئێکێ بۆ پرۆژەیاسایا ڤەگەڕاندنا مولکان بۆ خودانێن وان ل دویڤ ژمارەکا بریارێن جڤاتا سەرکرداتییا شۆرەشێ (مجلس قيادة الثورة) یا ژناڤچووی کەت.