شاندییا نه‌ته‌وه‌یێن ئێكگرتى ل ئیراقێ هێرشا لسه‌ر كێلگه‌ها كورمۆر شه‌رمزار كر و راگه‌هاند، ئه‌و پێشه‌وازیێ ل ڤه‌كۆلینێ بۆ ده‌سته‌سه‌ركرنا هێرشكه‌ران و دادگه‌هكرنا وان دكه‌ن.
شاندییا نه‌ته‌وه‌یێن ئێكگرتى ( یۆنامى) ل تۆڕا جڤاكییا ئێكس هه‌لوه‌ستێ خۆ ل دۆر هێرشا درۆنییا كورمۆر راگه‌هاند و ئاماژه‌ ب وێ ئێكێ دا، ئه‌و ب توندى هێرشا لسه‌ر وێ كێلگه‌هێ شه‌رمزار دكه‌ن، هیڤییا بله‌ز باشبوونا ره‌وشا بریندارێن رویدانێ ژى خواست سه‌ره‌خۆشی ژى ل كه‌سوكارێن وان كه‌سان كر یێن د رویدانێ دا ژیانا خۆ ژ ده‌ستدارى.
یۆنامى رژدى ل وێ ئێكێ كر، پێشه‌وازیێ ل ڤه‌كۆلینێ ل دۆر ڤێ رویدانێ و ده‌سته‌سه‌ركرنا هێرشكه‌ران و دادگه‌هه‌كرنا وان دكه‌ن.
شڤێدى ب درۆنان هێرش لسه‌ر كێلگه‌ها كورمۆر ل باژێركێ قادر كه‌ره‌م سه‌ر ب ده‌ڤه‌ردارییا چه‌مچه‌مال هاته‌ كرن، ژ ئه‌گه‌رێ هێرشێ 4 كه‌سان ژیانا خۆ ژ ده‌ستدا كو خه‌لكێ یه‌مه‌نێنه‌.
كێلگه‌ها كورمۆر ل سالا 2007ێ ل سنورێ باژێركێ قادر كه‌ره‌م هاتییه‌ دامه‌زراندن و كۆمپانییا دانه‌غاز به‌رهه‌مئینانێ تێدا دكه‌ت، ب پێدانا غازێ ب وه‌ستگه‌هێن كاره‌با چه‌مچه‌مال و هه‌ولێرێ و 67% كاره‌با هه‌رێمێ دابین دكه‌ت.