گاڤ

ئەڤرۆ د چارچووڤەیێ گەڕا چارێک دویماهییێ یا چامپیۆنز لیگێ دا دو یارییێن بهێز هەنە و ئێک ژ وان یارییان د ناڤبەرا هەلگرێن نازناڤێن وێ خۆلێ یێن هەردو وەرزێن بۆری دایە.

ئەڤرۆ د چارچووڤەیێ چامپیۆنز لیگا ئەورۆپا دا یانەیا ریال مەدرید یا ئسپانی، هەلگرا نازناڤێ پێرار دێ مێهڤاندارییا یانەیا مانچستەر ستی یا ئنگلیزی، هەلگرا نازناڤێ پار کەت و ئەڤە ب ئێک ژ بهێزترین یارییێن گەڕا چارێک دویماهییێ یا چامپیۆنز لیگا ئەڤسالە دهێتە هەژمارتن.

هەر د چارچووڤەیێ گەڕا چارێک دویماهییێ یا چامپیۆنز لیگێ دا، ئەڤرۆ دێ پێشەنگا خۆلا پلە نایاب یا ئنگلیزی یانەیا ئەرسینال پێشوازییێ ل یانەیا بایێرن میۆنشن یا ئەلمانی کەت و ئەڤە ژی ب یارییەکا بهێز دهێتە هەژمارتن، ژبەر کو یانەیا ئەرسینال ئەڤسالە ل ئاستەکێ باشە و یانەیا بایێرن میۆنشن ژی د خۆلا ئەلمانی دا ل رێزا دویێ دهێت و دەلیڤەیا برنا خۆلا ئەلمانی بۆ وێ گەلەک ب زەحمەت کەفتییە، لەورا فۆکسا وێ یانەیێ مایە ل سەر چامپیۆنز لیگێ.

هەر د چارچووڤەیێ گەڕا چارێک دویماهییێ یا چامپیۆنز لیگێ دا، سوبەهی دێ یانەیا پاریس سان جێرمان یا فرەنسی پێشوازییێ ل یانەیا بارسێلۆنا یا ئسپانی کەت و یانەیا ئەتلەتیکۆ مەدرید یا ئسپانی دێ ل یاریگەها خۆ پێشوازییێ ل یانەیا برۆسیا دۆرتمۆند یا ئەلمانی کەت.

حەفتییا بهێت دێ یاری د ناڤبەرا هەمان یانەیان دا ل یاریگەهێن مانچستەر ستی، بایێرن میۆنشن، بارسێلۆنا و برۆسیا دۆرتمۆند دا هێنە کرن ڤە و یانەیێن د ئەنجامێ هەردو یارییان دا سەردکەڤن، دێ دەربازی قووناغا پێش دویماهییێ یا چامپیۆنز لیگێ بن.