به‌رشلۆنا ئێكه‌م هه‌ڤبه‌ستا خۆ بۆ مێركاتۆیا هاڤینێ ده‌ستنیشانكر
بەلاڤ بکە
گاڤ
پشتى ئه‌نجامێن نه‌باش یێن به‌رشلۆنا ل ڤى وه‌رزى، یانه بزاڤێن بهێزكرنا رێزێن خۆ بۆ وه‌رزێ بهێت دكه‌ت و رۆژنامه‌یه‌كا كه‌ته‌لۆنى ئێكه‌م هه‌ڤبه‌ستا چاڤه‌رێكرى یا به‌رشلۆنا د مێركاتۆیا هاڤینێ دا ئاشكراكر.
ئێك ژ هێلێن یارییێ یێن یانه‌یا به‌رشلۆنا ژ بۆ بهێزكرنا تیمێ ب رێكا ئه‌نجامدانا هه‌ڤبه‌ستێن نوى ده‌ستنیشانكرین، هێلا ناڤه‌راست یا به‌رگرییێ Defensive Midfield ـه، ل ده‌مه‌كێ ئوریۆل رومیۆ نه‌شیایه ئاستێن باش ل وى جهى پێشكێشبكه‌ت هه‌ر ژ ده‌مێ ژ جیرۆنا گه‌هشتیه به‌رشلۆنا، ژ به‌ر ڤێ چه‌ندێ چاڤى هێرناندێز پشتبه‌ستنێ ل سه‌ر ئه‌ندریاس كریستێنسن یاریكه‌رێ هێلا به‌رگرییێ ل هێلا ناڤه‌راست یا به‌رگرییێ یا به‌رشلۆنا دكه‌ت.
رۆژنامه‌یا سپۆرت یا كه‌ته‌لۆنى ئاشكرا كریه "ئێكه‌م هه‌ڤبه‌ستا به‌رشلۆنا د مێركاتۆیێ دا دێ ل گه‌ل گویدۆ رۆدریگز ستێرا ریال بێتیس بیت كو چاڤى راهێنه‌رێ به‌رشلۆنا پێ داخباره".
رۆژنامه‌یێ دیار ژى كریه "بریكارێن رۆدریگزى د ده‌مه‌كێ دى دا ژ ڤێ حه‌فتییێ ل گه‌ل به‌رپرسێن به‌رشلۆنا كۆمبووینه".
راگه‌هاندیه ژى "گرێدانا هه‌ڤبه‌ستێ به‌ره‌ڤ پێشڤه‌چوونێ ڤه دچیت و گۆتوبێژێن ئه‌رێنى هه‌بووینه".
سپۆرت ئاماژه ب وێ چه‌ندێ ژى كریه "رێككه‌فتن ل سه‌ر مه‌رجێن كه‌سۆكى ل گه‌ل وى یاریكه‌رى د رێره‌وه‌كێ دروست دا دبۆریت لێ تا نوكه هه‌ڤبه‌ست نه‌هاتیه ئێكلاكرن".
ل دویماهییا ڤى وه‌رزى هه‌ڤبه‌ستا گویدۆ رۆدریگز یێ 30 سالى ل گه‌ل ریال بێتیس ب دویماهیك دهێت و ئه‌ڤ چه‌نده رێكێ دده‌تێ ب هه‌روه‌یى بچیته دناڤ رێزێن هه‌ر یانه‌یه‌كا دى دا.
به‌رى نوكه به‌رشلۆنا راگه‌هاند بوو كو چاڤى هێرناندێز راهێنه‌رێ یانه‌یێ ژ بڕیارا خۆ یا به‌رێ یا هێلانا یانه‌یا ل دویماهییا ڤى وه‌رزى لێڤه‌بوو و بڕیار دا هه‌تا دویماهییا هه‌ڤبه‌ستا وى ل گه‌ل یانه‌یێ ل هاڤینا سالا 2025 به‌رده‌وام بیت.
