گاڤ

ده‌سته‌یا خۆلا ئنگلترا بڕیاره‌كا نوى بۆ كێمكرنا شاشیێن دادڤانان د یارییان دا دده‌ت كو ل به‌ره‌ هه‌ر ژ ده‌ستپێكا وه‌رزێ بهێت 2024-2025 بكه‌ڤیته‌ د وارێ بجهئینانێ دا.

بڕیار هاتیه‌ دان ته‌كنیكا نیمچه‌ ئوتوماتیكى یا ئاشكراكرنا ئۆفسایدان ل وه‌رزێ بهێت یێ خۆلا ئنگلترا بهێته‌ بجهئینان پشتى یانه‌یێن ئنگلیزى ئه‌ڤرۆ پێنجشه‌مبیێ ب كۆده‌نگى ل سه‌ر رازیبووین.

ئه‌و ته‌كنیكه‌ د نوكه‌ دا ل هنده‌ك قاره‌مانیێن مه‌زن هاتیه‌ بكارئینان ژ وان ژى موندیالا بۆرى 2022، جاما ئاسیا یا بۆرى و چامپیۆنز لیگا ئه‌ورۆپى لێ تا نوكه‌ د خۆلا ئنگلترا دا نه‌هاتیه‌ بكارئینان، به‌لكو د وێ خۆلێ دا ته‌كنیكا VAR دهێته‌ بكارئینان كو پتر ده‌مى دبه‌ت هه‌روه‌سا جه‌ماوه‌رێ دناڤ یاریگه‌هێ دا دوباره‌كرنا ڤیدیۆیى نابینن كا ئۆفسایده‌ یان نه‌.

ته‌كنیكا نوى یا كو دێ ل وه‌رزێ بهێت ل خۆلا ئنگلترا هێته‌ بكارئینان، ب ته‌كنیكا نیمچه‌ ئوتوماتیكى دهێته‌ بناڤكرن چونكى د وێ ته‌كنیكى دا ژماره‌یه‌كا كامیره‌یان بۆ دویڤچوونا ته‌په‌یێ و هه‌ر یاریكه‌ره‌كى هه‌یه‌ و ته‌كنولۆژیا ب تنێ نه‌شێت ده‌ستنیشان بكه‌ت كا یاریكه‌ر د ئۆفسایدێ دایه‌ یان نه‌، به‌لكو ل سه‌ر به‌رپرسێن ته‌كنیكا دادڤانێ ڤیدیۆیى پێدڤیه‌ ل گۆره‌ى داتایێن هه‌یى پشتراستیێ ژێ بكه‌ن كا ئۆفسایده‌ یان نه‌.