ئەگەرەکێ مەزن هەیە حەلبووسی ڤەگەریتە سەرۆکاتییا پەرلەمانی
بەلاڤ بکە
گاڤ
پارتا ته‌قه‌دوم ئاماژه دا هه‌بوونا ده‌لیڤه‌یه‌كێ بۆ ڤه‌گه‌ڕیانا محه‌مه‌د حه‌لبووسى سه‌رۆكێ حزبێ ژ بۆ پۆستێ سه‌رۆكاتییا په‌رله‌مانێ ئیراقێ.
محه‌مه‌د عه‌له‌وى سه‌ركرده ژ ته‌قه‌دوم بۆ گاڤ دیاركر "تا نوكه چ پێشڤه‌چوون ل دۆر هه‌لبژارتنا سه‌رۆكه‌كێ نوى بۆ په‌رله‌مانی نینن و ئه‌م د وێ باوه‌ریێ دا نینین كو تا نوكه چ پێگوهۆڕ بۆ حه‌لبووسى هه‌بن".
راگه‌هاند ژى "ڤه‌گه‌ڕیانا حه‌لبووسى بۆ پۆستێ وى تشته‌كێ د شیان دایه ژ روویێن یاسایى و سیاسى ڤه".
ئاماژه ب وێ چه‌ندێ ژى كر "بیرۆكه‌یا ڤه‌گه‌ڕیانا حه‌لبووسى بۆ سه‌رۆكاتییا جڤاتا نوینه‌ران ژ لایێ هنده‌ك لایه‌نێن چارچووڤه‌یێ هه‌ماهه‌نگیێ ڤه هاتیه پێشكێشكرن، ڤه‌گه‌ڕیانا حه‌لبووسى دێ ب رێكێن یاسایى و دادوه‌رى بیت".
زێده‌تر ژى گۆت "د حاله‌تێ نه‌ڤه‌گه‌ڕیانا حه‌لبووسى دا، ئه‌م د وێ باوه‌ریێ دا نینین پێگوهۆڕه‌ك بۆ وى هه‌بیت و ئه‌م پێشبینى دكه‌ین پۆستێ سه‌رۆكێ په‌رله‌مانى هه‌تا هه‌لبژارتنێن په‌رله‌مانى یێن بهێت بمینیته ڤالا، هه‌مى لایه‌ن به‌حسێ زه‌حمه‌تییا هه‌لبژارتنا پێگوهۆڕه‌كێ بۆ وى د ده‌مێ بهێت دا دكه‌ن".
به‌رى نوكه دادگه‌ها فیدرالى بڕیارا هه‌لوه‌شاندنا ئه‌ندامه‌تییا محه‌مه‌د حه‌لبووسى د په‌رله‌مانى دا دابوو و تا نوكه لایه‌نێن سیاسى نه‌گه‌هشتینه رێككه‌فتنێ ژ بۆ هه‌لبژارتنا سه‌رۆكه‌كێ نوى بۆ په‌رله‌مانى.
