بێرناردۆ سێلڤا: ئهو شهڤا من لێدانا پێنالتییێ ژدهستداى ئهز باش نهنڤستم
گاڤ
بێرناردۆ سێلڤا یاریكهرێ پۆرتۆگالى یێ مانچێستهر ستى دیاركر؛ ژدهستدانا وى بۆ لێدانا پێنالتییێ د یارییا ل گهل ریال مهدرید د قووناغا چارێك دویماهیێ یا چامپیۆنز لیگا ئهورۆپا دا تشتهكێ ب زهحمهت بوو و ئهو ل شهڤا پشتى یاریێ باش نهنڤست.
ریال مهدرید ل چارشهمبییا بۆرى دهرباز ببوو سیمى فاینالا چامپیۆنز لیگێ ل سهر كیستێ مانچێستهر ستى ب لێدانێن ئێكلاكهر، بێرناردۆ سێلڤا لێدانا دوێ یا ئێكلاكهر یا مان ستى ژدهستدابوو پشتى تهپه ئاراستهى نیڤا گۆلێ كرى و ژ لایێ ئهندرێ لونین گۆلچیێ ریال مهدرید ڤه ب ساناهى تهپه هاتبوو گرتن، ههروهسا ماتیۆ كۆڤاسێچ ژى لێدانا خۆ یا ئێكلاكهر نهكربوو گۆل و ل دویماهییێ ریال مهدرید ب ئهنجامێ 4-3 د لێدانێن ئێكلاكهر دا پشتى ب دویماهیك هاتنا یاریێ ب وهكههڤییێ ئهنجامێ 1-1 ل یاریگهها ئیتیحاد و ب دویماهیك هاتنا یارییا چوونێ ژى ل سانتیاگۆ بێرنابێیۆ ب ئهنجامێ 3-3 بسهركهفتبوو و دهرباز ببوو قووناغا بهرى دویماهیێ.
بێرناردۆ سێلڤا د داخۆیانییهكا میدیایى دا ئهڤرۆ ئێكشهمبییێ گۆت "ئاراستهكرنا تهپهیێ بۆ ناڤهراستا گۆلێ هزرهكا جوانه چونكى 99% ژ گۆلچییان د لێدانێن پێنالتییان دا دلڤن".
دیار ژى كر "ئهڤه تهپاپێى یه، تشتهكێ ب زهحمهت بوو، ل شهڤا ئێكێ پشتى ژدهستدانا پێنالتییێ ئهز باش نهنڤستم، ل شهڤا دوێ رهوش پیچهك باشتر بوو و ل شهڤا سیێ رهوش نیمچه ئاسایى بوو".
زێده ژى كر "رهوش ئهڤهیه و ئهڤهیه تهپاپێى، پێدڤیه مرۆڤ سهرهدهریێ ل گهل ڤان ههستان بكهت".