گاڤ

لژنه‌یا دارایى یا په‌رله‌مانێ ئیراقێ راگه‌هاند؛ په‌رله‌مان چاڤه‌رێى گه‌هشتنا خشته‌یێن بودجه‌یا سالا 2024 د ڤێ هه‌یڤێ دا دكه‌ت.

عه‌توان عه‌توانى سه‌رۆكێ لژنه‌یا دارایى ئه‌ڤرۆ ئێكشه‌مبیێ راگه‌هاند؛ ئه‌م چاڤه‌رێى گه‌هشتنا خشته‌یێن بودجه‌یا سالا 2024 د ڤێ هه‌یڤێ دا دكه‌ین.

دیار ژى كر "بزاڤ ژ بۆ راستڤه‌كرنا رێره‌وێ بودجه‌یێ هه‌نه‌ ئه‌و ژى ب رێكا زێده‌كرنا داهاتێن نه‌په‌ترۆلى، هاندانا كه‌رتێ تایبه‌ت و كێمكرنا مه‌زاختیێن بكاربرنێ".

تا نوكه‌ خشته‌یێن بودجه‌یا گشتى یا سالا 2024 ل ده‌ف جڤاتا وه‌زیرێن ئیراقێ یه‌، ل گۆره‌ى زانیارییان، ژ به‌ر زێده‌بوونا كورتئینانێ و مه‌زاختنێ د بودجه‌یێ دا تا نوكه‌ حكومه‌تێ بۆ جڤاتا نوینه‌ران نه‌هنارتییه‌ و لێكۆلینێ ل دۆر دكه‌ت.

پشتى جڤاتا وه‌زیران خشته‌یێن بودجه‌یا گشتى یا ئه‌ڤ ساله‌ ته‌مام دكه‌ت، دێ ژ بۆ په‌رله‌مانى بۆ ده‌نگدانێ ل سه‌ر و په‌سه‌ندكرنێ هنێریت.

لژنه‌یا دارایى یا په‌رله‌مانێ ئیراقێ به‌رى نوكه‌ ئه‌گه‌رێ گیرۆبوونا هنارتنا بودجه‌یا گشتى بۆ په‌رله‌مانى ئاشكرا كربوو.
موعین كازمى ئه‌ندامێ لژنه‌یێ بۆ گاڤ دیاركربوو "ژ به‌ر گوهۆڕینا خشته‌یێن بودجه‌یێ، هنارتنا وێ بۆ جڤاتا نوینه‌ران گیرۆبوویه‌".
ئاشكرا ژى كربوو "بودجه‌یا سالا 2024ێ 228 تریلیۆن دینارن پشتى زێده‌كرنا خه‌رجیێن بكاربرنێ و وه‌به‌رهێنانێ، كورتئینانا پێشبینیكرى ژى 80 تریلیۆن دینارن، ل ده‌مه‌كێ بودجه‌یا سالا 2023ێ 199 تریلیۆن دینار بوون".
خۆیا ژى كربوو "جڤاتا وه‌زیران پشتى ب دویماهیك هاتنا سه‌ره‌دانا محه‌مه‌د شیاع سوودانى سه‌رۆكوه‌زیرێ ئیراقێ بۆ ئه‌مریكا و ڤه‌گه‌ڕیانا وى بۆ به‌غدا دێ ده‌نگى ل سه‌ر خشته‌یێن بودجه‌یێ ده‌ت".
لژنه‌یا دارایى یا په‌رله‌مانێ ئیراقێ ل دویماهییا شوباتا بۆرى ته‌مامكرنا وه‌زاره‌تا دارایى بۆ به‌رهه‌ڤكرنا خشته‌یێن بودجه‌یا سالا 2024 راگه‌هاند بوو و دیاركربوو كو د هه‌یڤا ئادارێ دا دێ بۆ په‌رله‌مانى هێته‌ ره‌وانه‌كرن، لێ هه‌تا نوكه كو ئه‌م به‌ره‌ڤ دویماهییا نیسانێ ڤه‌ دچین‌ بۆ په‌رله‌مانى نه‌هاتیه‌ ره‌وانه‌كرن.