واشنتۆن پۆست: سيستهمێ ترۆمبێلێن بێ شۆفێر ل ئهمريكا دبيته جهێ بگروڤهكێشێ
گاڤ نيوز
سيستهمێ ترۆمبێلێن بێ شۆفێر كو كۆمپانيا تێسلا يا ئيلۆن ماسك ملياردێرێ ئهمريكى د تاقيكرنان دا ل سهر بهردهوامه، بوويه ئهگهرێ سهرهلدانا ههوهكا نهرازيبوونێ ل سهر ڤى سيستهمى ل ئهمريكا.
رۆژنامهيا واشنتۆن پۆست بهلاڤكريه؛ دان ئوداود سهرۆكێ بجهئينانێ يێ كۆمپانيا Grenn Hills Software و دامهزرێنهرێ Dawn project دهست ب مهزنترين ههوا ل دژى هاژۆتنا ب خۆ يا ترۆمبێلان بێى شۆفێر كو ل بهره ل دويماهيا ههيڤا بهێت دهستپێبكهت، راگههانديه.
ئوداود دهست ب ههوێن راگههاندنێ يێن مهزن ب بكارئينانا پارچهيێن ڤيديۆيان كريه ههروهسا ب مليۆنان دولار بۆ كڕينا ترۆمبێلێن تێسلا بۆ تاقيكرنان و سهلماندنا مهترسيا تهكنولوژيايا يا نوى مهزاختينه.
رۆژنامهيا ئهمريكى ژ دان ئوداود ڤهگوهاستيه؛ تهكنولوژيايا برێڤهچوونا ترۆمبێلان بێى شۆفێر تاقيكرنهكا ب مهترسى يه ل سهر خهلكى ب گشتى هاتيه سهپاندن و ئهڤ چهنده ب رێكا لێكۆلينهكا وهزارهتا داد و سكالايهكا دادوهرى يا بهرفرههـ ل ڤێ دويماهيێ هاتيه سهلماندن.
ئوداود ل سهر وێ چهندێ كار دكهت كو بسهلمينيت ئهو تهكنولوژيايه شاشيێن مهزن پهيدا دكهت و راگههاند؛ ل گۆرهى ئهناليزهكرنا ب دههان دهمژمێران بۆ بابهتى، ديار بوويه كو ئهو تهكنولوژيايه ههر 8 خۆلهكان شاشيهكێ دكهت.
ناڤهاتى داخواز كر كو سيستهمێ ترۆمبێلێن بێ شۆفێر ب تهمامى ل ئهمريكا بهێته قهدهغهكرن.
ژ لايێ خۆڤه، كۆمپانيا تێسلا داخواز ژ دان ئوداود كر كو دهست ژ ههوێن خۆ بهردهت و كۆمپانيێ دياركر كو ئهو دێ د تهكنولوژيا خۆ يا نوى دا بهردهوام بيت چونكى رێگريێ ل رويدانێن هاتنوچوونێ يێن ژ ئهنجامێ شاشيێن شۆفێران پهيدا دبن، دكهت.
ئيلۆن ماسك رێڤهبهرێ كۆمپانيا تێسلا د ڤى دهربارهى دا راگههاند بوو؛ تهكنولوژيايا ترۆمبێلێن بێ شۆفێر گيانێ مرۆڤان دپارێزيت و رێكنهدان ب ڤان ترۆمبێلان شاشيهكا ئهخلاقيه.