گاڤ

دەستەیا گشتیا گەشتوگۆزاری یا هەرێما کوردستانێ دو بریارێن نوی دەرئێخستن و رێژەیا هێزا کاری یا ناڤخۆ د وی کەرتی دا زێدە کر.

ئەمەل جەلال، سەرۆکا دەستەیا گەشتوگۆزارێ یا حکومەتا هەرێما کوردستانێ راگەهاند؛ بریارا ئێکێ بلندکرنا رێژەیا هێزا کاری یا ناڤخۆیە و پێدڤیە ل هەمی فەرمانگەهـ و جهێن گەشتیاری هێزا کاری ٪75 یا ناڤخۆ بیت و د دو قووناغان دا ئەو بریارە دێ هێتە بجهئینان کو قووناغا ئێکێ ب رێژەیا ٪30 دەستپێدکەت.

هەروەسا گۆت: بریار هاتیە دان زمانێ کوردی ببیتە زمانێ ئێکێ و سەرەکی یێ هەمی جهێن گەشتیاری و پێدڤیە تابلۆ و مینیۆیێن خوارنگەهـ، هۆتێل و جهێن گەشتیاری زمانێ کوردی یێ سەرەکی بیت و پاشی د دویڤ دا زمانێن دی هەبن.

ئەمەل جەلالێ دیار ژی کر، بۆ بجهئینانا ڤێ بریارێ پێدڤیە راهێنانێن فێربوونا زمانێ کوردی ب کارمەندێن کەرتێ گەشتیاری بهێنە کرن و پشتی فێربوونا وان دەلیڤەیا کاری د کەرتێ گەشتیاری دا ب خەلکێ بیانێ بهێتە دان و یێن پێشتر دەلیڤەیێن کاری بۆ پەیدا بووین پێدڤیە خۆلێن فێربوونا زمانێ کوردی بۆ بهێنە ڤەکرن.

لژنەیا دەستەیا گەشتوگۆزارێ بۆ بجهئینانا بریاران و دانا رێنمایان دێ سەرەدانا هەر هەشت رێڤەبەریێن گشتی یێن گەشتیاری کەت و پرۆسە دێ ژ دهۆکێ دەستپێکەت.

هەروەسا هاتیە، لژنەیێن هەڤپشک یێن قایمقامیان ل پارێزگەهـ و ئیدارەیێن سەربخۆ دێ دیڤچوونا جهێن گەشتیاری کەن و ئەگەر پێگیر نەبن، دێ جارا ئێکێ هوشداری پێ هێتە دان، جارا دویێ دێ بۆ دەمێ حەفت رۆژان ئەو جهـ هێتە دائێخستن و ل جارا سێیێ ژی دێ موولەتا وان ژێ هێتە وەرگرتن.