گاڤ

ڤاكسینه‌ك بۆ نه‌خۆشییا په‌نجه‌شێرا پیستى هاتیه‌ دروستكرن كو نوكه‌ قووناغا سیێ یا تاقیكرنان ل سه‌ر دهێنه‌ كرن، ده‌مێ ئه‌و ڤاكسینه‌ ل گه‌ل ده‌رمانێ كیترۆدا Keytruda یێ به‌رگرییا له‌شى پێكڤه ژ لایێ وان نه‌خۆشێن وه‌رمینێن مێلانۆمایێ یێن مه‌ترسیدار ل ده‌ف هه‌ین بهێنه‌ وه‌رگرتن، مه‌ترسییا به‌لاڤبوونا خانه‌یێن په‌نجه‌شێرێ كێم دكه‌ن و مه‌ترسییا مرنێ ب په‌نجه‌شێرێ یان ڤه‌گه‌ڕیانا په‌نجه‌شێرێ ب رێژه‌یا 49% كێم دكه‌ن ب هه‌ڤبه‌ركرن ل گه‌ل وان كه‌سێن ده‌رمانێ كیترۆدا ب تنێ وه‌ردگرن.

ژماره‌یه‌كا زانایان بۆ جارا ئێكێ شیاینه‌ ڤاكسینه‌كێ بۆ نه‌خۆشییا په‌نجه‌شێرا پیستى دروستبكه‌ن و د نوكه‌ دا قووناغا سیێ یا تاقیكرنان ل سه‌ر ژماره‌یه‌كا نه‌خۆشێن په‌نجه‌شێرا پیستى برێڤه‌دچیت.

زانایان دیاركرینه‌؛ ئه‌و ڤاكسینێ په‌نجه‌شێرا پیستى،‌ ره‌نگه‌ ل دژى په‌نجه‌شێرێن سیهێن هه‌ناسه‌دانێ، میزلدانێ و گولچیسكان ژى یێ كاریگه‌ر بیت.

ناڤێ ڤاكسینى mRNA-4157 (V940) ـه و ب رێكا mRNA رادبیت ب هاندانا به‌رسڤدانا سیسته‌مێ به‌رگرییێ یێ له‌شى ل دژى نه‌خۆشییێ، ڤاكسین كارێ نیاسینا نه‌خۆشییێ و به‌رسینگگرتنا وێ ل پاشه‌رۆژێ ئه‌نجامدده‌ت.

نوشدار هیدز شۆ لێكۆله‌را رێكخه‌ر بۆ لێكۆلینێ دبێژیت "ڤاكسین دشێت تووشبوویێن په‌نجه‌شێرا پیستى چاره‌سه‌ر بكه‌ت هه‌روه‌سا ل سه‌ر هنده‌ك جۆرێن دى ژى یێن په‌نجه‌شێرێ دهێته‌ تاقیكرن، ئه‌ڤه‌ چاره‌سه‌رییه‌كا تاك ب تاكه‌ و بۆ هه‌ر نه‌خۆشه‌كى ب شێوه‌یه‌كێ تایبه‌ت دهێته‌ دروستكرن".

د قووناغا دوێ یا تاقیكرنان دا كو هه‌ردو كۆمپانیێن ده‌رمانان مودێرنا و MSD تێدا پشكدار ببوون، ئه‌و نه‌خۆشێن وه‌رمینێن مێلانۆمایێ یێن مه‌ترسیدار ل ده‌ف وان هه‌ین، هه‌ر سێ حه‌فتییان قۆرچه‌ك ژ ڤاكسینى وه‌رگرتینه‌ و بلندترین رادده‌یێ وه‌رگرتنا ڤاكسینى 9 قۆرچ بوون.

د ئه‌نجامێن تاقیكرنان دا دیاربوویه‌؛ ئه‌و كه‌سێن قۆرچێن ڤاكسینى و ده‌رمانێ چاره‌سه‌ریێ یێ به‌رگرییا له‌شى (كیترۆدا) پێكڤه‌ وه‌رگرتین، كێمتر رویبروى مه‌ترسییا مرنێ یان ڤه‌گه‌ڕیانا په‌نجه‌شێرێ بووینه‌ د ماوه‌یێ 3 سالان دا ب رێژه‌یا 49% ب هه‌ڤبه‌ركرن ل گه‌ل وان كه‌سێن ب تنێ ده‌رمانێ كیترۆدا خوارین.

د نوكه‌ دا، قووناغا سیێ یا تاقیكرنان ل سه‌ر وى ده‌رمانى برێڤه‌دچیت، تاقیكرن ژ لایێ سازییا نه‌خۆشخانه‌یێن زانكۆیا كولیج له‌نده‌ن یا گرێداى ده‌سته‌یا خزمه‌تگۆزاریێن ساخله‌میێ یا نیشتیمانى یا بریتانى دهێنه‌ كرن.

زانایان دیاركرینه‌؛ ئه‌و ڤاكسینه‌ نویترین ده‌ستكه‌فتییه ‌د سه‌رده‌مێ زێڕین یێ لێكۆلینێن په‌نجه‌شێرێ دا و ره‌نگه‌ په‌نجه‌شێرێ چاره‌سه‌ر بكه‌ت.

ئییان فۆلكس رێڤه‌به‌رێ بجهئینانێ یێ لێكۆلینان و داهێنانێ د سازییا لێكۆلینێن په‌نجه‌شێرێ دا ل بریتانیا ل دۆر ڤاكسینێ نوى دبێژیت "تاقیكرنێن جیهانى ل سه‌ر ڤاكسینى دیار دكه‌ن كو ئه‌م د چه‌رخێ زێڕین یێ لێكۆلینێن په‌نجه‌شێرێ داینه‌".