ئه‌ردۆگانى چ گۆته سه‌رۆكوه‌زیرێ ئیراقێ؟
بەلاڤ بکە
گاڤ
سه‌رۆكوه‌زيرێ ئيراقێ ئه‌ڤرۆ سێشه‌مبيێ په‌يوه‌نديه‌كا ته‌له‌فۆنى ل گه‌ل سه‌رۆككۆمارێ توركيا ئه‌نجامدا و تێدا سه‌رۆكوه‌زيرێ ئيراقێ بۆ سه‌ره‌دانا توركيا هاته داخوازكرن.
د به‌يانه‌كا ئۆفيسا محه‌مه‌د شياع سودانى دا هاتيه؛ سودانى په‌يوه‌نديه‌كا ته‌له‌فۆنى ژ ره‌جه‌ب ته‌يب ئه‌ردۆگان وه‌رگرت و تێدا بزاڤێن پێشڤه‌برنا هه‌ڤكاريا ئابوورى و پاراستنا سنووران هاتنه به‌حسكرن.
تێدا هاتيه ژى؛ ئه‌ردۆگان جاره‌كا دى داخواز ژ سودانى كر كو سه‌ره‌دانا توركيا بكه‌ت.
د به‌يانێ دا هاتيه ژى؛ به‌هرا ئيراقێ ژ رويبارێن ديجله و فۆرات، هه‌ڤكارى د بوارێن بازرگانى و وه‌به‌رهێنانێ دا و گرێدانا هێلا شه‌مه‌نده‌فڕێ دناڤبه‌را به‌نده‌رێ فاو ل به‌سره و ئه‌ردێ توركيا دا ژ ته‌وه‌رێن دى يێن په‌يوه‌نديا ته‌له‌فۆنى بوون.
هه‌روه‌سا ل گۆره‌ى به‌يانه‌كا رێڤه‌به‌ريا په‌يوه‌نديان يا سه‌رۆكاتيا توركيا؛ ره‌جه‌ب ته‌يب ئه‌ردۆگان و محه‌مه‌د شياع سودانى په‌يوه‌نديێن دوقولى د ناڤبه‌را توركيا و ئيراقێ دا هه‌روه‌سا كێشه‌يێن هه‌رێمايه‌تى به‌حسكرن.
ديار ژى كريه؛ سه‌رۆككۆمارێ توركيا ته‌كه‌زى ل سه‌ر ب بهێزكرنا هه‌ڤكاريا دوقولى د هه‌مى بواران دا ل گه‌ل ئيراقێ كر و دياركر "ئه‌نقه‌ره گرنگيێ ب سه‌قامگيرى و ئێكپارچه‌ييا ئاخا ئيراقێ دده‌ت و نه‌هێلانا په‌كه‌كێ ل ئيراقێ د به‌رژه‌وه‌نديا ئاسايشا نيشتيمانى يا ئيراقێ دايه".
ل 29ى كانوينا ئێكێ يا سالا بۆرى ژى، سه‌رۆككۆمارێ توركيا نامه‌ك ب رێكا باليۆزێ توركيا ل ئيراقێ ئاراسته‌ى سه‌رۆكوه‌زيرێ ئيراقێ كربوو و تێدا داخواز ژێ كربوو سه‌ره‌دانا توركيا بكه‌ت.
