كليچدار ئوگلۆ: پێدڤيه خانوبهر ل توركيا بۆ بيانيان نههێنه فرۆشتن
گاڤ
سهرۆكێ پارتا گهل يا كۆمارى يا توركى ئهگهرێ بلندبوونا بهايێن خانيان و كرێيێن وان ل توركيا بۆ كڕينا زێده يا بيانيان بۆ خانهبهران ل توركيا ڤهگهڕاند و دياركر كو پێدڤيه رێك ب ڤێ چهندێ نههێته دان.
كهمال كليچدار ئوگلۆ ئهڤرۆ پێنجشهمبيێ راگههاند "ئهگهر د ههلبژارتنان دا بسهركهڤين، رێكێ ب فرۆشتنا خانوبهران بۆ بيانيان نادهين".
ديار ژى كر؛ بۆ دهمێ پێنج سالان ئهم رێكێ ب فرۆشتنا خانهبهران بۆ بيانيان نادهين و تا بها ههڤسهنگ نهبن، دێ ئهڤ چهنده مينيت.
ئاماژه دا وێ چهندێ ژى؛ بدهستڤهئينانا خانيان بۆ وهلاتێن تورك ب زهحمهتتر لێهاتيه و كرێيێن خانيان و ههلئاوسان بهردهوام زێده دبن.
ههر ژ دهستپێكا ئهڤ ساله بهايێ خانيان و كرێيێن وان ل توركيا بهرهڤ بلندبوونهكا مهزن چووينه و ل هندهك تاخێن ستهنبۆلێ وهكى باشاك شههير و كايا شههير گههشتينه رێژهيا 500% ژ بهايێ بهرێ.
رهجهب تهيب ئهردۆگان سهرۆككۆمارێ توركيا ل ئيلۆنا سالا 2018ێ بڕيارا كێمكرنا بهايێ پێدڤى يێ كڕينا خانوبهران ل توركيا ژ لايێ بيانيان ڤه بۆ وهرگرتنا رهگهزنامهيێ ژ مليۆن دۆلاران بۆ 250 هزار دۆلاران كێمكربوو.
پشتى وێ بڕيارا سهرۆكێ توركيا، بازارهكێ مهزن ل توركيا ل سهر كڕينا خانوبهران ژ لايێ بيانيان ڤه و ب تايبهت ئيراقيان پهيدابوويه.
ههلبژارتنێن سهرۆككۆمارێ توركيا و پهرلهمانێ توركى د ههيڤا خزيرانێ يا ئهڤ ساله دا دێ برێڤهچن و رهوشێن ئابوورى و دارايى ل وهلاتى ب فاكتهرهكێ گرنگ د ههلبژارتنان دا دهێنه هژمارتن.