دادگهها فیدرال دێ سێ بابهتێن گرێدایى ههرێما كوردستانێ بهحس كهت
گاڤ
دادگهها فیدرال یا ئیراقێ دێ سێ روینشتنێن ژ ئێك جودا ل سهر سێ بابهتێن گرێدایى ههرێما كوردستانێ كهت و دو ژ وان گرێدایى پارهیێ مووچهخۆڕان و ئهرزاقى نه و ئێك ژى ل دۆر دهما درێژكرنا دهما قانوونى یا پهڕلهمانێ كوردستانێ نه.
ل گۆرەى خشتهیێ كۆمبوونا دادگهها بلندا فیدرال د ههیاما حهفت رۆژێن بهێت دا دادگههـ دێ سێ كۆمبوونێن تایبهت ل دۆر پارهیێ بۆ مووچهخۆرێن ههرێما كوردستانێ، پارهیێ مههانه یێ ئهرزاقى و دهما درێژكرنا پهڕلهمانێ كوردستانێ كۆمبیت و ئهو سكالایان ل سهر ڤان بابهتان هاتینه تۆماركرن دو جاران ژى ژ ئالیێ دادگههێ ڤه روونشتن ل سهر هاتیه كرن.
خشتهیێ دادگههێ دیاركریه ل رۆژا 25-1-2023یێ ل دۆر سكالایا دو پهڕلهمانتارانه كو داخوازكرینه ئهو بڕیارا هنارتنا 20 ملیار دیناران بۆ ههرێما كوردستانێ بهێته ههلوهشاندن.
ههروهسا دیاركریه، ل رۆژا 30-1-2023یێ دادگههـ دێ ل دۆر پارهیێ ئهرزاقى كۆمبیت كو ژ ئالیێ كۆمپانیا گشتى یا بازرگانى یا خوارنێ یا حكومهتا فیدرال ل دژى وهزیرێ بازرگانیا ههرێمێ و رێڤهبهرێ گشتى هاتیه تۆماركرن و تێدا دخوازن ئهو پارهیێ ژ وهلاتیێن ههرێما كوردستانێ وەردگرن كو ژ كانوونا دووێ یا سالا 2004ێ تا 30 ئیلۆنا 2021ێ بۆ ئیراقێ بهێته رهوانهكرن.
دادگهها بلندا ئیراقێ دیاركریه ژى ل 31-1-2023یێ دادگههـ دێ ل دۆر سكالایهكێ كۆمبیت كو تێدا هاتیه داخوازكرن بڕیارا پهڕلهمانێ كوردستانێ یا درێژكرنا دهما پهڕلهمانى بهێته ههلوهشاندن.