زه‌نگێن ئاگه‌هداركرنێ ل سه‌رانسه‌رى ئۆكراينا لێدده‌ن
بەلاڤ بکە
گاڤ
زه‌نگێن ئاگه‌هداركرنێ ل كيێڤ پايته‌ختێ ئۆكراينا و سه‌رانسه‌رى وه‌لاتى هه‌ڤده‌م ل گه‌ل گۆپيتكا سه‌ركرده‌يێن ئێكه‌تيا ئه‌ورۆپى ل گه‌ل سه‌رۆكێ ئۆكراينا لێدده‌ن.
ڤولوديمير زێلێنسكى سه‌رۆكێ ئۆكراينا ئه‌ڤرۆ ئه‌ينيێ د گۆپيتكا سه‌ركرده‌يێن ئه‌ورۆپى دا، پێشوازى ل چارلز ميشێل سه‌رۆكێ جڤاتا ئه‌ورۆپى و ئۆرسولا ڤۆن دێر لاين سه‌رۆكا كۆميسيۆنا ئه‌ورۆپى ل كيێڤ كر.
د به‌يانه‌كا هه‌ڤپشك يا هه‌رسێيان دا هاتيه؛ ئێكه‌تيا ئه‌ورۆپى دێ پشته‌ڤانيا ئۆكراينا و گه‌لێ ئۆكراينا بۆ به‌رسينگگرتنا شه‌ڕێ دژمنكارى يێ رۆسيا به‌رده‌وام كه‌ت.
"هه‌ڤده‌م ل گه‌ل بڕێڤچوونا گۆپيتكێ، ده‌نگێ زه‌نگێن ئاگه‌هداركرنێ ل كيێڤ پايته‌ختێ ئۆكراينا و سه‌رانسه‌رى وى وه‌لاتى وه‌ك هوشدارى ژ هێرشێن رۆسى يێن پێشبينيكرى لێدده‌ن."، ل گۆره‌ى ئاژانسا رۆيته‌رز.
ڤۆن دێر لاين ژ به‌رى نوكه راگه‌هاند بوو كو هه‌ڤپه‌يمانيا ئه‌ورۆپى دێ پاكێجه‌كا نوى يا سزايان ل سه‌ر موسكۆيێ هه‌ڤده‌م ل گه‌ل بۆرينا ساله‌كێ ژ شه‌ڕێ راگه‌هينيت.
ئاشكرا ژى كربوو؛ ل رۆژا 24/2/2023 هه‌ڤده‌م ل گه‌ل بۆرينا ساله‌كێ ژ شه‌ڕى ل ئۆكراينا، دێ پاكێجا ده‌هێ يا سزايان ل سه‌ر رۆسيا هێته سه‌پاندن.
