گاڤ – تایبەت

دەما هەیڤەکێ یە ل ئالیەکێ شنگالێ قەیرانا غازێ هەیە و دەڤەردارێ شنگالێ ب رێکا گاڤ هوشداریەکێ ددەت.

نایف سەیدۆ، دەڤەردارێ شنگالێ ب وەکالەت بۆ گاڤ گۆت: بەری هەیڤەکێ کارگەها غازێ یا شنگالێ ژ ئەگەرەکێ نەدیار هاتە داخستن و نوکە د دەست هێزێن ئێمناهیێ دایە، ئەڤە بوویە ئەگەر کو قەیرانا غازێ ل سنۆرێ ناوچەداریا سنوونێ رویبدەت و سەنتەرێ سنوونێ و شەش کۆمەلگەهـ و 40 گوند نوکە د قەیرانەکا دژوار یا غازێ دانە.

ژێدەری هەروەسا دیار کر: پشتی گرتنا کارگەها شنگالێ، کارگەها مشێرفا کو ل ناوچەداریا رەبیعەیە، غازا پێدڤی ددا سنوونێ، لێ ژ ئەگەرێ نەدانا باجێ، کارگەها مشێرفا ژی هاتیە داخستن و دەڤەر د قەیرانەکا غازێ یا دژوار دایە، ئەگەر حکومەت چارە نەکەت، دێ کارەساتێن مەزن دروست بن.

نایف سەیدۆی خۆیا ژی کر: 20 بریکارێن بەلاڤکرنا غازێ ل سنۆرێ سنوونێ هەنە، رۆژانە ئەو پێدڤی ب 300 تا 400 تەنێن غازێنە داکو قەیران چێنەبن، لێ نوکە چ غاز ب وان بریکاران ناهێتە دان.

نایف سەیدۆی د بەردەوامیا ئاخفتنا خۆ دا گۆت: ل ئالیێ دی یێ شنگالێ ل ناوچەداریا گر عزێر، قەیرانا غازێ نینە، ژبەر کو ئەو غازێ ژ دەڤەرداریا بەعاج وەردگرن.

پێشتر بابەتێ بەلاڤکرنا غازێ و چاڤدێریا کارگەهێن غازێ د دەست ئیدارەیێن دەڤەران دا بوو، لێ ب بریارا سەرۆکوەزیرێ ئیراقێ نوکە چاڤدێری و بەلاڤکرنا غازێ د دەست هێزێن ئەمنی یێن ئیراقێ دایە.