خامنەئی: نابیت ئەمریکیەکێ بتنێ ژی ل ئیراقێ بمینیت
بەلاڤ بکە
گاڤ
ئاژانسا رۆیتەرز راگەهاند: رابەرێ کۆمارا ئیسلامی یا ئیرانێ د کۆمبوونا ل گەل سەرۆککۆمارێ ئیراقێ دا دژاتیا خۆ ب ئاشکرایی دژی هەبوونا ئەمریکیان ل ئیراقێ دیار کریە و ئەمریکی ب کەسێن نەدۆست ناڤ کرینە.
ئاژانسا رۆیتەرز ل گۆرەی ژێدەرەکێ تایبەت راگەهاند: عەلی خامەنەئی، رابەرێ کۆمارا ئیسلامی یا ئیرانێ د کۆمبوونا خۆ یا ل گەل د. لەتیف رەشید، سەرۆککۆمارێ ئیراقێ دا گۆتیە "ئەمریکی هەڤپەیمانێن کەسێ نینن و پێدڤیە ئیراقێ رێکێ نەدەت ئێک ئەمریکیێ بتنێ ژی ل ئیراقێ بمینیت".
ژێدەری دایە زانین ژی: خامنەئی د کۆمبوونێ دا گۆتیە ژی "ئەمریکی بۆ هەڤپەیمانێن خۆ یێن ئەورۆپا هەڤال نینن تاکو بۆ وەلاتەکێ دی هەڤال و دۆست بن".
پێشتر سەرۆکاتیا کۆماریا ئیراقێ د بەیانەکێ دا راگەهاندبوو: د. لەتیف رەشید، سەرۆککۆمارێ ئیراقێ و عەلی خامەنەئی، رابەرێ کۆمارا ئیسلامی یا ئیرانێ د کۆمبوونەکێ دا پەیوەندیێن ل سەر بنەمایێ هەڤالینیێ و پێشڤەبرنا پەیوەندیان بۆ پاراستنا بەرژەوەندیێن هەڤپشک د خزمەتا گەلێن هەردو وەلاتان دا گۆتوبێژ کرینە.
