گاڤ

توركیا پرۆژه‌یه‌كێ نوى ل باكۆرێ سووریا ده‌ستپێكر و ئارمانج ژێ ڤه‌گه‌ڕاندنا نزیكى ملیۆن كۆچبه‌رێن سوورى یه‌ ل توركیا بۆ وه‌لاتێ وان.

توركیا پرۆژه‌یه‌كێ نوى یێ ئاڤاكرنا یه‌كه‌یێن ئاكنجیبوونێ بۆ سووریێن ل توركیا ل باكۆرێ سووریا ده‌ستپێكر و مه‌ره‌م ژێ ڤه‌گه‌ڕیانا سووریانه‌ بۆ وه‌لاتێ وان ل ده‌مه‌كێ ڤه‌گه‌ڕاندنا كۆچبه‌ران بوویه‌ بابه‌تێ گه‌رم د هه‌وا ریكلامێ یا به‌ربژارێن پۆستێ سه‌رۆككۆمارێ توركیا دا.

ئاژانسێن توركى به‌لاڤكرینه‌؛ ده‌ست ب دانانا ستوینێن ژماره‌یه‌كا یه‌كه‌یێن ئاكنجیبوونێ ل ده‌وروبه‌رێن باژێڕكێ غه‌ندوره‌ ل ده‌ڤه‌را جه‌رابلس یا هه‌ڤسنوور ل گه‌ل توركیا هاته‌ كرن.

سلێمان سویلۆ وه‌زیرێ ناڤخۆ یێ توركیا راگه‌هاندیه‌ كو دێ 240 هزار یه‌كه‌ێن ئاكنجیبوونێ ل وێ ده‌ڤه‌رێ بۆ سووریان یێن دڤێن ب حه‌زا خۆ ڤه‌گه‌ڕنه‌ڤه‌ وه‌لاتێ خۆ هێنه‌ ئاڤاكرن.

پتر ژ 3 ملیۆن كۆچبه‌رێن سوورى ل توركیا هه‌نه‌ و ره‌جه‌ب ته‌یب ئه‌ردۆگان سه‌رۆككۆمارێ توركیا ل 8ى ڤێ هه‌یڤێ دیاركربوو كو توركیا ب پشته‌ڤانیا رێكخراوێن هه‌وارهاتنێ یێن نێڤده‌وله‌تى دێ یه‌كه‌یێن ئاكنجیبوونێ یێن نوى ل 13 ده‌ڤه‌رێن سوورى بۆ ڤه‌گه‌ڕاندنا نزیكى ملیۆن كۆچبه‌رێن سوورى ئاڤا كه‌ت.

وه‌زیرێ ناڤخۆ یێ توركیا ئاماژه‌ ب وێ چه‌ندێ ژى كریه‌ كو تا نوكه‌ 554 هزار سوورى ب حه‌زا خۆ ڤه‌گه‌ڕیاینه‌ وه‌لاتێ خۆ.