“ ریال مه‌درید د بزاڤێن ڤه‌گوهاستنا هارى كین بۆ دناڤ رێزێن خۆ دا به‌رده‌وامه”
بەلاڤ بکە
گاڤ
راپۆرته‌كا ئسپانى ئاشكرا كر كو یانه‌یا ریال مه‌درید دێ بزاڤان كه‌ت فشاران ل سه‌ر سه‌رۆكێ یانه‌یا توتێنهام بكه‌ت دا كو ده‌ستبه‌ردانێ ژ هارى كین هێرشبه‌رێ یانه‌یێ بكه‌ت.
پشتى چوونا كه‌ریم بێنزێماى بۆ خۆلا سعوودیه، یانه‌یا ریال مه‌درید ل هێرشبه‌ره‌كێ دگه‌ڕیت دا جهێ وى بگریت و ل گه‌ل نه‌زه‌لالیا هه‌لویستێ ئێمباپێ و شیاوا نویكرنا وى بۆ گرێبه‌ستا وى ل گه‌ل پاریس سان جێرمان تا سالا 2025، ریال مه‌درید هزر د ڤه‌گوهاستنا هارى كین بۆ دناڤ رێزێن خۆ دا دكه‌ت.
ل گۆره‌ى رۆژنامه‌یا ماركا یا ئسپانى؛ هه‌ڤبه‌ستا هارى كین ل گه‌ل توتێنهام ل هاڤینا سالا 2024 ب دویماهیك دهێت و ئه‌گه‌ر یانه وى د مێركاتۆیا هاڤینا ئه‌ڤ ساله دا نه‌فڕۆشیت، دێ ل سالا بهێت ب هه‌روه‌یى ژ رێزێن یانه‌یێ ده‌ركه‌ڤیت.
دیار ژى كریه؛ ریال مه‌درید دێ بزاڤان كه‌ت فشارێ ل سه‌ر دانیێل لێڤى سه‌رۆكێ یانه‌یا توتێنهام ژ بۆ ڤه‌گوهاستنا هارى كین بكه‌ت و یانه‌یا توتێنهام ره‌نگه رازى بیت ب بهایه‌كێ كێم وى یاریكه‌رى بفڕۆشیت ل جهێ كو ل هاڤینا بهێت ب هه‌روه‌یى ژده‌ستبده‌ت.
ئه‌ڤ پێشهاته د ده‌مه‌كێ دانه كو هنده‌ك راپۆرتێن رۆژنامه‌ڤانى ل حه‌فتیا بۆرى دیاركربوون كو ریال مه‌درید ده‌ستبه‌رداى هزرا گرێدانا هه‌ڤبه‌ستێ ل گه‌ل هارى كین بوویه.
