رۆسیا و ناتۆ ..ئاماده‌كارى بۆ ترسناكترین سیناریۆ
بەلاڤ بکە
گاڤ
د گۆپیتكا خۆ یا لیتوانیا دا، ناتۆیێ رۆسیا ب مه‌زنترین گه‌ف لسه‌ر ئه‌ندامێن خۆ دا زانین، گۆپیتكه‌ك كو دانوستاندنێ لسه‌ر ئه‌ندامبوونا سوێد و ئۆكراینایێ بۆ ناڤ وێ قولپا سه‌ربازى دكه‌ت. رۆسیا ژى ترس و گومان ژ نێزكبوونا پتر یا ناتۆیێ بۆ سنورێن خۆ هه‌نه و هوشداریێ دده‌ت. دڤێ ناڤبه‌رێ دا هه‌ردو ئالى سنورێن خۆ ل همبه‌ر هه‌ڤدو قایمتر لێ دكه‌ن و ته‌نانه‌ت به‌لاڤبوونا چه‌كێ ئه‌تۆمى ل سنورێن هه‌ردو ئالیان سیناریۆیا هه‌رى ترسناكه بۆ رۆسیا و ناتۆیێ و به‌لكو بۆ هه‌موو جیهانێ.
موسكۆ ژ گه‌هشتنا ناتۆیێ بۆ سنورێن خۆ نه ئارامه
موسكۆ ناتۆیێ وه‌كو گه‌فه‌كا به‌رده‌وام و دژمنه‌كا سه‌رسه‌‌خت یا خۆ دزانیت، و هه‌ر نێزیكبوونه‌كا پتر یا ناتۆیێ بۆ سنورێن رۆسیا ب تایبه‌تى بۆ سوێد و ئۆكراینا ب گه‌ف لسه‌ر خۆ دزانیت، ده‌ستپێكرنا شه‌ڕى دگه‌ل ئۆكراینا ژى هه‌ر بۆ پاشڤه‌برنا مه‌ترسیێن ناتۆیێ بوو ل همبه‌ر رۆسیا.
رۆس: ل ئۆكراینا دگه‌ل ناتۆیێ د شه‌ڕى داینه نه‌ك كیێڤێ
ژ ده‌ستپێكا شه‌ڕێ ئۆكرانیا به‌رپرسێن رۆس به‌رده‌وام دبێژن ئه‌و دگه‌ل ناتۆیێ د شه‌ڕى دانه نه‌ك ئۆكراینا و به‌رپرسێن ناتۆیێ ژى ئه‌و ئێك نه ڤه‌شارتى یه كو ب هه‌مى شیانێن خۆ پشته‌ڤانیێ ل كیێڤ دكه‌ن دژى موسكۆیێ.
هه‌ڤبه‌ركرنا شیانێن سه‌ربازیێن رۆسیا و ناتۆیێ
- روسیا ل پله‌یا دووێ دهێت دناڤا رێزبه‌ندیا بهێزترین سوپایین جیهانێ دا ب هه‌بوونا ملیۆنه‌ك و 300 هزار سه‌ربازان، ناتۆ هژماره‌كا سوپایێن جیهانێ ب خۆڤه دگریت ژ وان ژى سوپایێ ئه‌مریكا كو پێشه‌نگێ سوپایێن جیهانێ یه.
- رۆسیا خودان 4 هزار فرۆكه‌یێن شه‌ڕكه‌ره. لێ وه‌لاتێن خودان سوپا د ناتۆیێ دا 18 هزار فرۆكه‌یێن شه‌ڕكه‌ر هه‌نه و گه‌له‌ك ل به‌راهیا رۆسیانه.
- رۆسیا خودان 22 هزار زریپۆشانه ل همبه‌ر ژى ناتۆیێ 16 هزر زریپۆش هه‌نه.
- رۆسیا خودان 603 گه‌میێن جه‌نگى یه، ناتۆیێ 1145 گه‌میێن جه‌نگى هه‌نه.
ناتۆیێ 40 هزار سه‌رباز ل به‌ره‌یێ رۆژهه‌لات هه‌نه و دشێت د ماوه‌یه‌كێ كێم دا و بۆ هه‌ر به‌رسڤه‌كا بله‌ز وێ هژمارێ بۆ 300 هزار سه‌ربازان زێده بكه‌ت.
ئه‌مریكا ب 50 بنگه‌هێن سه‌ربازى رۆسیا دۆرپێچكرى یه، رۆسیا ژى لڤێنێن خۆ ل ده‌ریا بالتیك زێده‌كرینه
پشتى ده‌ستپێكرنا شه‌ڕێ ئوكراینا، ئه‌مریكا هژماره‌كا بنگه‌هێن خۆ یێن سه‌ربازى ژ رۆژهه‌لات تا رۆژئاڤا ئه‌ورۆپا بۆ 50 بنگه‌هان زێده‌كرینه كو ب دۆرپێچكرنا رۆسیا ل كێشوه‌رێ ئه‌ورۆپا دهێته هژمارتن. رۆسیا ژى ل سنورێن خۆ یێن رۆژائاڤا و باكورێ رۆژئاڤا ل ده‌ریا بالتیك هێزێن خۆ یێن ده‌ریایی پێشڤه‌برینه.
رۆسیا خودان 6255 كولاڤێن ئه‌تۆمى یه. ناتۆیێ 6065 كولاڤێن ئه‌تۆمى هه‌نه كو یێن هه‌ر ئێك ژ ئەمریكا و بریتانیا و فره‌نسانه.
ب ترسترین كۆمكرنا ئه‌تۆمى ل رۆژهه‌لاتێ ئه‌ورۆپا د رۆژه‌ڤێ دایه
رۆسیا چه‌كێ خۆ یێ ئه‌تۆمى پێشخستى یه، ب ره‌نگه‌كى هێزا خۆ یا ئه‌تۆمى گه‌هاندى یه بیلارۆسیا و لسه‌ر ئاخا وى وه‌لاتى به‌لاڤكرى یه، ڤێ ئێكی ژى وه‌لاتێن رۆژهه‌لاتا ئه‌ورۆپا ترساندینه و دخوازن هه‌مان هێزا ناتۆیێ ل ناڤا وه‌لاتێن وان بهێته به‌لاڤكرن. ب ڤێ ئێكێ ئاماده‌كارى بۆ ترسناكترین سیناریۆ لسه‌ر سنورێن رۆسیا و ناتۆیێ دهێته كرن.
