گاڤ

پلاتفۆرما وه‌تسئه‌پى دێ خزمه‌تگۆزارییه‌كا نوى به‌رده‌ستكه‌ت و ب رێكا وێ بكارهینه‌رێن وه‌تسئه‌پى بێى په‌یوه‌ندیكرنێ ب ئه‌نترنێتێ دێ شێن وێنه‌ و ڤیدیۆیان بۆ بكارهینه‌رێن دى یێن نزیكى خۆ ب رێكه‌كا وه‌كى یا بلۆتۆسى بهێنرن.

مالپه‌رێ WABetaInfo دیاركریه‌ "خزمه‌تگۆزارییا نوى دێ هاریكارییا بكارهینه‌ران كه‌ت فایلان بهنێرن بێى پێدڤى ب په‌یوه‌ندیكرنێ ب ئه‌نترنێتى ببن، ئانكۆ بكارهینه‌ر دێ شێت ڤیدیۆیان و وێنه‌یان بۆ هه‌ر بكارهینه‌ره‌كێ وه‌تسئه‌پى یێ نزیكى خۆ بهنێریت بێى پێدڤییاتییا په‌یوه‌ندیكرنێ ب ئه‌نترنێتێ بۆ هه‌ر ئێك ژ وان".

ئاماژه‌ ب وێ چه‌ندێ ژى كریه‌ "ناڤێ خزمه‌تگۆزارییا نوى People nearby یه‌ ئانكۆ كه‌سێن نزیك، ئه‌و خزمه‌تگۆزارییه‌ د كارێ خۆ دا پشتبه‌ستنێ ل سه‌ر ڤرێكرنا داتایان ب رێكا تۆرێن بلۆتۆسى دكه‌ت وه‌كى د ساخله‌تێ Fast Send د ئامیره‌یێن ئه‌ندرۆید دا یان ژى ساخله‌تێ AirDrop د ئامیره‌یێن ئه‌پل دا هه‌ى".

ژ بۆ مفاوه‌رگرتنێ ژ خزمه‌تگۆزارییا نوى، پێدڤییه‌ نویترین ڤێرژنێ تێست ژ ئه‌پلیكه‌یشنێ وه‌تسئه‌پى بهێته‌ داونلۆدكرن و پێدڤییه‌ رێك بهێته‌ دان ب گه‌هشتنێ Access بۆ فایلێن د ئامیره‌ی دا، هه‌روه‌سا بۆ جهێ جیۆگرافى و بۆ بلۆتۆسى.

ل گۆره‌ى زانیاریێن هه‌یى؛ كریارا ڤرێكرنا داتایان ب رێكا خزمه‌تگۆزارییا نوى دێ یا كۆدكرى Encrypted بیت و ژماره‌یا موبایلا وى كه‌سێ فایلان دهنێریت بۆ وه‌رگرێ فایلان دیار نابیت، ئه‌ڤ چه‌نده‌ ژ بۆ پاراستنا تایبه‌تمه‌ندییێ.

ده‌زگه‌هێن راگه‌هاندنێ ل ڤێ دویماهییێ خۆیاكربوون كو ئه‌پلیكه‌یشنێ وه‌تسئه‌پى دێ هنده‌ك ساخله‌تێن وه‌كى یێن د تێلیگرامى دا هه‌ین به‌رده‌ستكه‌ت، ژ وان ژى فیلته‌ركرنا چه‌تان كو ئه‌ڤ چه‌نده‌ بۆ پۆلینكرنا چه‌ت و نامه‌یێن مرۆڤى ل گه‌ل كه‌سێن دى ل سه‌ر ژماره‌یه‌كا جۆران هاریكاره‌.