بیرهات محمد سالح مام سین

گرنگی دان ب چاندنێ ژکارێن گەلەکێن پێتڤی یە بۆ ڤی وەلاتی، بتنێ ئەڤ کەرتە ب دروستی بهێتە گەشەکرن دێ گوهۆرینێن مەزن یێن ئابۆری دروست کەت، چونکی ئەڤ ئاخە گەنجینەیە و مرۆڤ مخابنیێ ب ئاخ و ئاڤ و هەوایێ وێ دبەت ئەگەر نە هێنە کەیسکرن، ب تایبەت دەڤەرا ناڤبری...

فەستیڤالا بەرهەمێن خۆمالی یێن دەڤەرا بەرواریا پالدانەکا بەرکەفتی بوو ژبۆ جۆتیارێن وێ دەڤەرێ کو ئێدی هەست ب هەبوونا خۆ بکەن، وبزانن کو ڕەنجا وان یا بەرهەمدارە، زێدەباری گرنگیا وێ بو سنورێ ناحیا کانی ماسێ کو ب دەڤەرەکا نە ئارام دهاتە دیارکرن، هەر ب وێ ئەگەرێ گەلەک خەلک ژدیتنا دێمەنێن جوان و سەقایێ خۆش یێ وێ دەڤەرێ د بێبار بوون، بەلێ بەروڤاژی وێ چەندێ فەستیڤال و هاتنوچوون ب ئارامی هاتنە ئەنجامدان و رویەکێ دی ژلایێ ئێمناهیێ ڤە بۆ خەلکی دیارکر، ب هیڤیا وێ ئێکێ کو هەر دەڤەرەک ب تایبەتمەندیا وێ بهێتە ناساندن وپێشڤەبرن، چ ب ڕێ یا ڤان ڕەنگە بزاڤا یان ژی هەر رێکەکا دی بیت.

هەلبەت پێنگاڤەکا باش بوو و کارەکێ ڕێک و پێک هاتبوکرن وەک ڕێڤەبرن و ئەمنیەت و جهـ و ڕێورەسم ودەمێ دیارکری، ڕەنجا دەستەکا بڕێڤەبرنێ چ وەک ئیدارا خۆجهی وچ وەک خەلکێ دەڤەرێ وچ وەک دەزگەهین ئەمنی جهێ دەست خۆشیێ بو، وهەلبژارتنا سێڤێ وەک ئارمێ فەستیڤالێ تشتەکێ دجهێ خۆ دا بو کو سومبولەکێ دیارێ دەڤەرێ یە، ویا ژهەمیێ دلخۆشکەر تر ڕەنگڤەدان وپشکداریەکا جوان وبەرفرەهـ ژلایێ خەلکێ زورینەیا دەڤەرێن کوردستانێ ڤە هاتە کرن ب تایبەت ل ڕوژا سیێ، کو ژ پێشبینیا من بخۆ مەزنتر بو،،،

بەلێ یا ڤالا نەبو ژ کێماسیان...

ب دیتنا من، چونکی فەستیڤالیاگرێدای دەڤەرا بەرواریا بو دا یا باشتر بیت هەر تشتێ نیشاندانێ ل وێرێ بەرواری با (هیڤیدارم کەس ب دەمارگیری د بوچونا من نەگەهیت)، ژبلی کو سترانبیژێن پشکدار بەهرا پتر یا وان ژدەرڤەی دەڤەرا بەرواریا بون، وبەرواریا بخۆ سترانبێژێن بەرکەفتی یێن هەین (ئەڤجا نزانم نە هاتبونە گازێکرن یان ئەو دئامادە نەبون خزمەتا دەڤەرا خۆ بکەن)!!! بەرهەمێن ناڤا فەستیڤالێژی یێن دەڤەرێن دی تێدا بون، بو نمونە تەحینا ئامێدیێ، ژاژیێ وانێ، برنج وسلکێن ئاکرێ، سماقا زێبارێ، زێدەباری جل بەرگێن ئاسایی کو ژچێکریێن وەلاتێ چینێ بون و.... هتد، ڕاستە هەر دەڤەرێن کوردستانی نە بەلێ یا دروست ڤیستیڤالێن تایبەت ب وان ڤە بو بهێنە ڕێکخستن نە تێکهەلی ڤێ ببان، چونکی ب ڤێ چەندێ پشکەک ژتایبەتمەندیا خۆ ژدەست دا، ددەمەکی دا ئەو بەرهەمێن مە گوتین هەمی ل وێ دەڤەرێ بخۆ یێن هەین،

دا یا باشتربیت ئەو بەرهەم ب بهایەکێ ڕەمزی هاتبانە فروتن یان هەر چ نە با ب بهایێ بازاری بان، بو هندێ پتر بەرهەمێن جوتیاران ژی هاتبانە فروتن، ودیسان بو وەرزێن بهێت دا پشکداریا خەلکی پتر لێ هاتبا، چونکی ژمن ڤە ئارمانج ژ فەستیڤالێپتر بابەتەکێ دانەنیاسین وتەرویجێ بو پتر ژ بازرگانیکرنا ئێکسەر، بەلێ جهێ داخێ یە سێڤ وهنار وگەلەک بەرهەمێن دێ یێن ناڤا فەستیڤالێل بازاری ئەرزانتر بون ژ یێن نیشاندای ل ڤیستیڤالێ، لەوما گەلەک ب کەیسکرن دبابەتی گەهەشتن، وئەڤە دیتنا گەلەک ژخەلکی بو..

دەرئەنجام ڤیستیڤالەکا سەرکەفتی بو بەلێ هیڤیدارین بو وەرزێن بهێت، ئەگەر هات وبەردەوامی پێ هاتە دان، پێداچونەک دڤان خالێن مە بەحس کرین دا بهێتە کرن، بێخەمەت سەرکفتنا ڤی پروژێ گرنگ..