ژ کۆبانێ و کۆچۆ بۆ غەزە
بەلاڤ بکە
رزگار حەمید شەریف
ل رۆژا ٣.٨.٢٠١٤ رێكخراوا تیرۆرستى یا داعش هێرشی دەڤەرا شنگارێ کر و دەست ب کۆمکوژیێ کر. د قۆناغا ئێکێ دا نێزیک ٥.٠٠٠ پیرەمێر و پیرەژن ب رەنگەک هۆڤانە ل بەر چاڤێن مالباتێن وان سەربرین و تیرۆر کرن و نێزیک ٦.٠٠٠ کچ و ژن و زارۆک وەک جاریە و غەنیمەتێ شەرێ برن و ل بازارێن رەقە و ته‌لەعفەر و موسل دەست ب کرین و فرۆتنا وان کرن و حەتا نوکە چارەنڤیسێ گەلەک ژ وان دیار نینه.
کۆمکوژیا ژ هەمیان دیارتر یا گوندێ کۆچو بی کو تیرۆرستێن دەولەتا ئیسلامیا داعش پشتی دەستداگرتنا ل سەر دەست ب سەرژێکرن و کوشتن و سووتانا نێزیک ٦٠٠ پیرەمێر و پیرەژن خەلکێ گوندی کر و نێزیک ١.٠٠٠ زارۆکێن کچ و کور وەک جاریە و خولام و خدام ب خوەرا برن کو ئێک ژوان نادیا موراد بی.
ل سپێدەهیا رۆژا ٢٥.٦.٢٠١٥ بەری کو خەلکێ موسلمانێ کوردێ کۆبانێ ژ بۆ نڤێژا سپێدە رابن، تیرۆریستێن دەولەتا ئیسلامیا داعش ژ نیشکەکێڤە ب چەند ترومبێلێن خوەکوژی هێرشی باژێرکێ کوبانێ کر کو ئەو چەند سال بی هاتبی دۆرپێچکرن ژ ئالیێ گروپێن تیرۆریستیڤە. گروپا ئیسلامیا داعش دڤێ هێرشا تیرۆریستیدا نێزیک ٣٠٠ کەسێن سیڤیلێن کوردێ موسلمان ژ زارۆک و ژن و پیر و کالان ب رەنگەک هۆڤانە سەرژێکر و تیرۆر کر لێ ب بەرەڤانیەکا ب هێز هاتنە شکاندن.
ئەڤە چەند کریارێن هۆڤانە یێن ئیسلامیێن توندرەو بین کو دەولەتا ئیسلامیا داعش د ماوێ سالا ئێکێ ژ حوکمێ خوە بەرامبەری گەلێ کوردستانێ کر. ب موخابنیڤە هیچ دەولەتەکا موسلمان ئەڤ کریارە شەرمەزار نەکر و میدیایێن دەولەتێن عەرەبی و موسلمان گرنگی ب ڤان کۆمکوژیا نەدا کو ل بەر چاڤێن وان بەرامبەر گەلێ کوردستانێ هاتە کرن!
ب شەرمزاریڤە ولاتیێن رۆژئاڤا و ئەمریکا ژیک و حکومەتێن وان ژیک ئەڤ کۆم کوژیێن گەلێ کوردستانێ ب گرنگی نە وەرگرتن و رێکارێن پێویست نە گرتنە بەر وەک دان پێدان ب ئەنجامێ رێفراندۆما سەربەخۆیا کوردستانێ ل سالا ٢٠١٧ وەک زامن کرنا نە دووبارەکرنا ڤان جینوسایدان ب رێکا پارستنا دەولەتا کوردستانێ.
فلستینیا نێزیک ٥٠ دەولەتێن موسلمان وەک پشتەڤان هەنە و ئیسرائیلیان ژیک نێزیک ٣٠ دەولەتێن ئەوروپی و ئەمریکا، مە کوردا کی هەیە کو ئەم وەسا بێ ئیتفاقن!؟!؟
